.png)
У адпаведнасці з рашэннем праўлення Нацыянальнага банка Беларусі 1 снежня 2009 года стаўка рэфінансавання зніжана на 0,5 працэнтнага пункта — да 13,5 гадавых.
Як патлумачылі ва ўпраўленні інфармацыі Нацбанка, падставай для такога кроку паслужылі ўстойлівае зніжэнне ўзроўню інфляцыі, рост дэпазітаў насельніцтва, стабільная сітуацыя на ўнутраным валютным рынку і шэраг іншых пазітыўных тэндэнцый у эканоміцы краіны. Гэтаму садзейнічала таксама працэнтная і курсавая палітыка Нацбанка. Разам з іншымі манетарнымі інструментамі яна станоўча паўплывала на павышэнне прывабнасці рублёвых зберажэнняў грамадзян і захаванне даверу насельніцтва да нацыянальнай валюты.
На прэс-канферэнцыі 29 кастрычніка кіраўнік Нацбанка Пётр Пракаповіч заявіў, што «час высокіх працэнтных ставак па крэдытах і дэпазітах у Беларусі заканчваецца». «У лістападзе правядзём кансультацыі з місіяй МВФ па гэтым пытанні і пачнём працэс паступовага зніжэння працэнтных ставак», — сказаў тады Пракаповіч.
Ён таксама паведаміў, што да канца 2010 года ўзровень стаўкі рэфінансавання складзе 9—12% гадавых, кошт новых рублёвых крэдытаў — 12—15% гадавых. «Не пазней за першае паўгоддзе 2010 года мы вернем да дакрызіснага ўзроўню памер працэнтных ставак», — заявіў тады журналістам кіраўнік Нацбанка.
Апошні раз стаўка рэфінансавання ў Беларусі мянялася 8 студзеня 2009 года і была павышаная Нацбанкам з 12 да 14% гадавых.
У 2008 годзе стаўка рэфінансавання павышалася пяць разоў: 1 ліпеня (з 10% да 10,25%), 13 жніўня (да 10,5%), 15 кастрычніка (да 10,75%), 12 лістапада (да 11%) і 17 снежня (да 12%).
