02.12.2009 / 19:20

У абдымку са зверам 13

Амаль гадзіну Мікалай Мусіенка змагаўся з ваўком — і перамог.

Амаль гадзіну Мікалай Мусіенка змагаўся з ваўком — і перамог.

Мікалай Іванавіч Мусіенка зараз знаходзіцца на лячэнні ў Пінскай цэнтральнай гарадской бальніцы. У яго скусаныя абедзве рукі, пашкоджаная галёнка. 68-гадовы мужчына трымаецца малайцом. Наперадзе курс лячэння і рэабілітацыі. У аддзяленні гнойнай хірургіі, куды пацярпелага перавялі пасля пяці дзён знаходжання ў траўматалогіі, да яго ставяцца з асаблівай сімпатыяй. Нячаста сюды трапляюць людзі, што з голымі рукамі пайшлі на ваўка. Іншага такога выпадку за мінулыя дзесяць гадоў медперсанал бальніцы прыгадаць не можа.


Не змаглі прывесці падобных прыкладаў са сваёй практыкі ні ў раённай ветлякарні, ні ў раённым цэнтры гігіены і эпідэміялогіі, дзе такія факты ў абавязковым парадку рэгіструюцца. Так, шалёныя лісы, бывае, прыходзяць у вёску. У гэтым годзе яны патурбавалі жыхароў Дабраслаўкі, Іванісаўкі і пасёлка Садовы. Мясцовае насельніцтва сустрэла няпрошаных гасцей рыдлёўкамі і віламі. А вось каб воўк ...

— Я працую электрыкам на свінакомплексе «Паўднёвы», — распавёў Мікалай Мусіенка журналістам, што наведалі яго ў шпіталі. — У пятніцу (27 лістапада — ВБ) спатрэбілася зняць паказанні лічыльнікаў на падстанцыях «Ясельда» і «Водазабор». Першая знаходзіцца на тэрыторыі прадпрыемства, а да другой ісці трэба праз лес. Там усё і здарылася. Я ўбачыў ваўка перад сабой літаральна за некалькі метраў, ён бег проста на мяне, а затым скокнуў ...

Мужчына здолеў паваліць драпежніка на зямлю, у ашчэраную пашчу дзікай жывёліны ўставіў локаць левай рукі, а правай схапіў за горла, не даючы таму магчымасці дыхаць. Так, абняўшыся, гледзячы адзін аднаму ў вочы, чалавек і звер праляжалі на зямлі каля пяцідзесяці хвілін.

— Я дакладна памятаю час, бо літаральна за пяць хвілін да нападу глядзеў на гадзіннік. Было 15.31. А калі цела ваўка абмякла, стрэлкі паказвалі 16.20. Фактычна я яго задушыў. Калі небяспека мінула, дастаў мабільны тэлефон і паведаміў пра тое, што здарылася таварышам па працы. Яны неадкладна прыбеглі да мяне, адвялі мяне ў памяшканне, перавязалі, паведамілі пра здарэнне ў раённую ветлячэбніцу, выклікалі хуткую дапамогу.

Галоўны ветэрынарны ўрач Пінскага раёна Барыс Капцюх, прыбыў на месца здарэння адразу ж пасля атрымання трывожнага сігналу пра кантакт чалавека з дзікай жывёлай.

Воўк быў невялікага памеру і вельмі худы, яго вага не перавышаў 40 кілаграмаў. Галаву жывёліны тут жа адправілі на даследаванне ў Брэсцкую абласную ветлабараторыю, каб высветліць ці быў воўк хворы на шаленства, а астатнюю частку тулава спалілі і парэшткі закапалі згодна інструкцыі. Мікалаю Мусіенку прапісалі курс антырабічных прышчэпак.

Як потым высветлілася, ваўка ў той дзень бачылі і іншыя супрацоўнікі свінакомплекса. Ён рухаўся з боку гарадскога пасёлка Лагішын проста да прахадной прадпрыемства. Але там яго сустрэлі вартаўнікі з рыдлёўкамі. Атрымаўшы ад іх належны адпор, жывёліна павярнула ў бок вёскі Вулька Гарадзішчанская, як раз туды, дзе знаходзіцца падстанцыя водазабору.

Павел Куніцкі, «Вечерний Брест»

0
Зважай! / Адказаць
02.12.2009 / 23:15
Шкада ваўка...
0
Наста / Адказаць
02.12.2009 / 23:38
І мне вельмі ж стала шкада жывёліну. Так, чалавек атрымаў значныя пашкоджанні, і на яго месцы быць не хацелася б, але ж... шкада ваўка.
0
Danik / Адказаць
02.12.2009 / 23:52
Зважай! напiсаў(ла) Снежань 2, 2009 у 22:15 Шкада ваўка.. ---------------------------------------------------------------------------- Маўглі?
Паказаць усе каментары/ 13 /
Каб пакінуць каментар, калі ласка, актывуйце JavaScript у наладах свайго браўзеру