Закрытае акцыянернае страхавое таварыства «Прамтрансінвест» выплаціла страхавое кампенсаванне сем’ям пілотаў знішчальніка Су‑27УБМ1 Аляксандра Марфіцкага і Аляксандра Жураўлевіча, якія разбіліся 30 жніўня на авіяшоу ў польскім Радоме. Пра гэта паведамілі ў кампаніі‑страхаўшчыку.
Згодна з заключаным 24 жніўня дагаворам, сума страхавога кампенсавання склала 30 тыс. даляраў на кожнага лётчыка.
Нагадаем, 24 жніўня было заключана яшчэ два дагаворы: першы — дагавор добраахвотнага страхавання паветранага судна на 870 тыс. даляраў ЗША; другі — дагавор добраахвотнага страхавання грамадзянскай адказнасці ўладальнікаў паветраных суднаў з лімітам адказнасці перад трэцімі асобамі на 1 млн. даляраў ЗША.
Што да самалёта, то, як БелапАН паведамляў раней, страхавая кампанія яшчэ чакае ад ваенных шэраг тэхнічных дакументаў. Пасля іх атрымання будзе прынята рашэнне аб правядзенні выплат.
Па трэцім дагаворы прэтэнзій ні да ЗАСТ «Прамтрансінвест», ні да Міністэрства абароны Беларусі не было.
Матэрыялы расследавання катастрофы паступілі ў Мінабароны Беларусі з Польшчы 20 кастрычніка. На наступны дзень беларускія ваенныя паабяцалі, што пасля вывучэння і аналізу прадставяць матэрыялы грамадскасці.
