Якія камп’ютарныя забаўкі распрацоўваюць беларускія кампаніі? Піша Ягор Марціновіч.
Камп’ютарныя гульні — не толькі забаўка для падлеткаў. Гэта і паказчык тэхнічнага развіцця краіны. Надзвычай складаны тып праграм — сведчанне высокага ўзроўню камп’ютарызацыі.
А гістарычныя гульні маюць істотны ідэалагічны складнік. Калі большасць праграм распрацоўвалася на Захадзе, амаль кожны бандыт у іх аказваўся «благім хлопцам з Расіі». А ў расійскіх гульнях падлеткам прапануецца дапамагчы непераможнай расійскай арміі паставіць на калені Еўропу.
Другая сусветная — наша ўсё
У Беларусі больш за два дзесяткі кампаній, якія спецыялізуюцца на стварэнні гульняў. Большасць распрацоўвае «казуальныя» праграмы, разабрацца ў якіх нескладана і школьніку, і хатняй гаспадыні.
Найбуйнейшая кампанія — «Геймстрым» — спецыялізуецца на больш складаных праектах. Яна працуе ў рамках Парка высокіх тэхналогій і ўжо выйшла на міжнародны ўзровень, заключаючы дамовы то з расійскімі, то з японскімі калегамі.
Самая вядомая беларуская гульня — «Аперацыя «Баграціён», якая была прызнаная найлепшай камп’ютарнай стратэгіяй на постсавецкай прасторы ў 2008 годзе. Міністэрства адукацыі нават рэкамендавала выкарыстоўваць яе на ўроках. Ухваліла і Адміністрацыя прэзідэнта. Праўда, чыноўнікі не ўлічылі, што ў гульні можна ваяваць і за немцаў… І з тым жа поспехам перамагчы.
Малпы, мядзведзі і ўсе‑ўсе‑ўсе
Ёсць у Беларусі кампанія, Steel Monkeys («Стальныя малпы») — стваральнік гоначных гульняў і «стралялак». Беларусы прыклалі руку і да папулярнага цыклу офісных гульняў Moorhuhn. У айчыннай частцы гульні курыца спаборнічае з астатнімі героямі ў гонках. Галоўны ж праект Steel Monkeys — крымінальная драма з жыцця Лас‑Вегаса. Яна ствараецца пяты год.
Беларуская кампанія Aliasworlds распрацоўвала серыю гульняў пра прыгоды медзведзяняці Сняжка. Ёсць і фірмы, якія распрацоўваюць гульні для мабільнікаў. Толькі вось увагі да беларушчыны і ў іх не назіраецца.
Мэтавая аўдыторыя не тут
Дырэктар «Геймстрыма» Іван Міхневіч заўважае: «Мэтавая аўдыторыя нашых гульняў знаходзіцца ў заходніх краінах, таму прадукты будуць выходзіць па‑англійску». Паколькі беларускі рынак невялікі, гульні, якія распрацоўваюцца ў нашай краіне, выдаюцца пераважна ў Расіі. А паколькі замежнікам не надта цікавая беларуская гісторыя, і камп’ютарных гульняў па яе матывах мала. Выключэнне стварае хіба Другая сусветная вайна.
