29.01.2010 / 14:06

Ігар Рачкоўскі: Мяжа стала аператыўнай, зручнай, ветлай і дабрэйшай 3

«Мяжу Беларусі з Еўрасаюзам перасякаць больш камфортна, чым з Расіяй, якой нібыта няма».

Старшыня дзяржаўнага памежнага камітэту Ігар Рачкоўскі 29 студзеня падводзіў вынікі працы беларускіх памежнікаў за мінулы год.

Ён паведаміў, што апошнія два гады адбываецца рэформа памежнай сістэмы. Па словах, Рачкоўскага першапачаткова беларускія памежнікі працавалі па старой савецкай традыцыі, якая заснаваная на абмежаваннях і забаронах. Цяпер жа прыйшоў час зламаць старыя стэрэатыпы і змяніць падыходы.

І на думку Рачкоўскага, у ягонага ведамства гэта атрымліваецца. «Беларуская мяжа стала аператыўнай, зручнай, ветлай і, калі хочаце, дабрэйшай», — зазначыў І.Рачкоўскі.

За 2009 год грамадзяне Беларусі перасякалі мяжу краіны 13 мільёнаў разоў, замежнікі — 10 мільёнаў.

Агулам сёння ў памежным камітэце працуе 13 тысяч чалавек.

«Цяпер памежнік павінен і выглядам, і ўнутрана адпавядаць патрабаванням XXI стагоддзя. Сённяшні памежнік гэта і опер, і юрыст, і паліглот, і тэхнар», — зазначыў старшыня камітэту.

«Самая спакойная і цывілізаваная ў нас мяжа з краінамі Прыбалтыкі і Польшчай», — сказаў на прэс‑канферэнцыі старшыня дзяржаўнага памежнага камітэта Ігар Рачкоўскі.

Пры гэтым ён паведаміў, што на мяжы з Еўрасаюзам усё ж існуе праблема нелегальнага правозу з Беларусі цыгарэтаў.

Самай жа праблемнай з’яўляецца мяжа з Украінай, дзе адбываецца 40% усіх затрыманняў.

Старшыня памежнага камітэта Ігар Рачкоўскі пракаментаваў сітуацыю, што стварылася на беларуска‑расійскай мяжы.

«Сапраўды, сёння на беларуска‑расійскай мяжы ў аднабаковым парадку з боку Расіі прысутнічае транспартны і практычна мытны кантроль. Гэта датычыць увоза на тэрыторыю РФ аўтамабіляў. Дзейнічае паўтара дзесятка мытных пунктаў. Назіраецца і павелічэнне колькасці мытных падраздзяленняў, а таксама развіццё мытнай інфаструктуры», — сказаў І.Рачкоўскі.

«Адсутнасць камфорту і часта вялікія чэргі, наяўнасць дадатковых працэдур на ўнутранай мяжы саюзнай дзяржавы выклікаюць непаразуменне з боку нашых грамадзян», — зазначыў старшыня камітэту.

Пры гэтым Рачкоўскі сказаў, што людзі часта скардзяцца, што мяжу Беларусі з Еўрасаюзам перасякаць больш камфортна, чым з Расіяй, якой нібыта няма.

«Ёсць праблемы, якія носяць тэхнічны характар. Спадзяюся, што пасля таго, як пачне дзейнічаць Мытны саюз, яны знікнуць», — запэўніў І.Рачкоўскі.

На ягоную думку, сама ідэя Мытнага саюза станоўчая, але павінны быць улічаныя патрабаванні ўсіх бакоў. «Калі не будзе роўных умоваў, то для чаго ён тады ствараецца?»

Ігар Рачкоўскі зазначыў, што беларуская мяжа цалкам інфарматызаваная і выведзеная ў агульную сетку дадзеных. У Расіі і Казахстане нічога падобнага няма.

Зміцер Панкавец

0
Стары Ёлуп / Адказаць
29.01.2010 / 14:23
Мяжа гэта разора, ці пагорак паміж зямельнымі вучасткамі... А граніца - гэта Дзяржаўная Граніца... Статут ВКЛ 88 году. «Розделъ девятый. О подъкоморыхъ в поветехъ и о правахъ земленыхъ; о границахъ и о межахъ» .... Слова мяжа набыло сваё сучаснае значэньне толькі ў ХХ стагодзьдзі. Раней у значэньні яго ўжываліся словы "рубеж" і "граніца". Мяжа, паводле Ластоўскага, усяго толькі неўзараная паласа зямлі, якая падзяляе ральлю. http://archive.svaboda.org/slova/miaza2.html
0
магадан / Адказаць
29.01.2010 / 14:49
так, мяжа, а дакладней яе перасячэнне сапраўды стала больш ветлай чым пару-тройку год таму. нельга гэта не адзначыць. хабары яшчэ бяруць, але прынамсі не так хамяць, як раней. Хаця яшчэ часам задаюць пытанне, кшталту "с какой целью едете за граніцу". апошні раз прамым тэкстам даў зразумець, што гэта не вашая справа і на такое пытанне адказваць я не буду. Але гэта сустракаў толькі калі едзеш спіртавозам у тэрэспаль.
0
Vital / Адказаць
30.01.2010 / 23:54
Traven 2009, Minsk-2. Zamezhnik padyhodzic da akenca z pagrancom. Toj " Vam nado strahovka" - " I don't understand" - "Nu strahovka vam nado!" - " Does anybody speak English hear?" U adkaz mauchanne. Tolki zhanchyna strahavy agent zxmagla dapamagchy. Heta adnosna paliglotau
Каб пакінуць каментар, калі ласка, актывуйце JavaScript у наладах свайго браўзеру