Устаноўчы з'езд маладзёжнай арганізацыі «Малады фронт» пачаў працу 30 студзеня ў памяшканні мінскай штаб-кватэры Партыі БНФ. З'езд будзе праходзіць у закрытым рэжыме,
паведаміў перад адкрыццём мерапрыемства кіраўнік арганізацыі Зміцер Дашкевіч.
«Мы не запрашалі на яго журналістаў,
бо тут будуць вырашацца ўнутраныя пытанні арганізацыі», — растлумачыў ён.
На з'езд прыехалі дэлегаты з усіх абласцей Беларусі. Кіраўнік «Маладога фронту» нагадаў, што арганізатары з'езда падавалі заяўкі на выдзяленне памяшкання для яго правядзення больш чым у дзесяць грамадскіх і культурных устаноў. «Аднак ва ўсіх установах у выдзяленні памяшканняў нам было адмоўлена. Прычыны адмоў стандартныя: ці памяшканне занятае, ці ў ім вядзецца рамонт. А Мінскі міжнародны адукацыйны цэнтр адмовіў у памяшканні таму, што адзін з заснавальнікаў гэтай установы, Мінгарвыканкам, не даў згоду на выдзяленне памяшкання», — сказаў Дашкевіч.
З'езд плануе зацвердзіць праграму і статут аб'яднання, абраць кіраўніцтва арганізацыі, прыняць некаторыя рэзалюцыі.
«Гэта значыць выканаць усё тое, што неабходна для рэгістрацыі арганізацыі ў Міністэрстве юстыцыі», — заявіў Дашкевіч.
Пры гэтым ён адзначыў, што не мае ніякіх ілюзій наконт магчымасці рэгістрацыі арганізацыі. «У 2006 і 2007 мы распачалі цэлы шэраг спроб па рэгістрацыі арганізацыі. І гэта пазбаўляе ўладу самага галоўнага аргументу — нібы мы не жадаем рэгістравацца, спецыяльна правакуем сітуацыю. Я не магу не адзначыць, што ўлады адмаўляюць у рэгістрацыі «МФ» па надуманых прычынах. Калі ў выпадку з БХД ёсць хоць бы фармальныя спасылкі на юрыдычныя рэчы, то ў нас адсутнічае нават такая фармальнасць. Напрыклад, на спробу зарэгістравацца ў 2007 годзе нам адказалі, што ў нашай арганізацыі шмат асуджаных за дзейнасць ад імя незарэгістраванай арганізацыі. Гэта значыць нас асудзілі за дзейнасць незарэгістраванай арганізацыі, і на гэтай падставе рэгістраваць адмаўляюцца. Гэта абсурд. Таму цяпер проста чарговая спроба зарэгістравацца. Мы яшчэ раз прадэманструем усю абсурднасць беларускаму грамадству, міжнароднай супольнасці», — заявіў Дашкевіч.
Гэта будзе ўжо шостая з 2000 года спроба зарэгістраваць «Малады фронт» у Беларусі. Афіцыйна арганізацыя зарэгістравана ў Чэхіі як міжнароднае маладзёжнае аб'яднанне.
