22.02.2010 / 12:33

Анжаліка Борыс сустрэнецца з Лехам Качынскім 1

Дэлегацыя неафіцыйнага Саюза палякаў выехала ў Варшаву 21 лютага.

Дэлегацыя неафіцыйнага Саюза палякаў на Беларусі (СПБ) на чале з Анжалікай Борыс сустрэнецца сёння з прэзідэнтам Польшчы Лехам Качыньскім.

Як паведаміла намеснік старшыні неафіцыйнага СПБ Анжаліка Арэхва, дэлегацыя выехала ў Варшаву 21 лютага. У яе склад, апрача Борыс, увайшлі старшыня галоўнага савета арганізацыі Анджэй Пачобут, намеснік старшыні Мечыслаў Яскевіч і прэс‑сакратар Ігар Банцар.

Усе трое былі асуджаны 15 лютага на пяць сутак адміністрацыйнага арышту за арганізацыю ў Гродне несанкцыянаванага мітынгу ў падтрымку Івянецкай арганізацыі незарэгістраванага СПБ, якая падверглася націску ўладаў. Раніцай 20 лютага яны выйшлі на волю.

Сустрэча прадстаўнікоў СПБ з прэзідэнтам Польшчы адбудзецца па ініцыятыве Качыньскага.

16 лютага Качыньскі накіраваў Аляксандру Лукашэнку ліст, у якім выказаў «рашучы пратэст у сувязі з ростам рэпрэсій супраць Саюза палякаў на Беларусі». Ён нагадаў аб міжнародных абавязацельствах Беларусі і двухбаковым дагаворы аб добрасуседстве, дружбе і супрацоўніцтве.

На думку Качыньскага, асабістае ўмяшанне ў інцыдэнт Аляксандра Лукашэнкі стала б доказам, што ён »хоча захаваць добрыя адносіны паміж дзвюма краінамі».

Нагадаем, раскол Саюза палякаў на Беларусі адбыўся ў 2005 годзе. Частка арганізацыі афіцыйна зарэгістравана Міністэрствам юстыцыі Беларусі. Неафіцыйнае крыло СПБ на чале з Анжалікай Борыс падтрымліваюць польскія ўлады.

Цяперашні беларуска‑польскі канфлікт узнік у сувязі з сітуацыяй вакол Дома польскага ў Івянцы (Валожынскі раён Мінскай вобласці), на які прэтэндуюць два крылы СПБ.

17 лютага суд Валожынскага раёна абавязаў дырэктара Дома польскага Тэрэсу Собаль пакінуць будынак і перадаць яго кіраўніцтву мясцовай арганізацыі зарэгістраванага СПБ Станіславу Бурачэўскаму. Кіраўніцтва неафіцыйнага СПБ мае намер абскардзіць рашэнне суда.

У Варшаве рыхтуецца спіс беларускіх грамадзян, замешаных у парушэнні правоў польскай меншасці ў Беларусі, якім будзе забаронены ўезд на тэрыторыю Польшчы.

У Мінску заяўляюць пра неабгрунтаванасць прэтэнзій Варшавы. Як заявіў на мінулым тыдні ў інтэрв’ю БелТА ўпаўнаважаны па справах рэлігій і нацыянальнасцей Леанід Гуляка,

«беларускія ўлады не ўмешваюцца ў сітуацыю з Домам польскім у Івянцы».

Каментуючы магчымае ўвядзенне Польшчай эканамічных і палітычных санкцый у дачыненні да беларускіх чыноўнікаў, ён падкрэсліў: «Беларусы не могуць быць прадметам торгу, тым больш на ўзроўні кіраўнікоў краін».

Віцэ‑страшыня Еўракамісіі Кэтрын Эштан заявіла, што дзеянні беларускіх уладаў у дачыненні да Саюза палякаў падрываюць намаганні Еўрасаюза па наладжванні адносін з Беларуссю.

0
Жук / Адказаць
24.02.2010 / 15:47
http://www.agency.tvn.pl/pl/video/przewodniczaca-zwiazku-polakow-na-bialorusi-andzelika-borys-z-wizyta-w-polsce-pakiet-wideo,7605 Andżelika Borys: "Tak ważne jest dlatego poparcie prezydenta Rzeczpospolitej, ponieważ dla wielu Polaków na Białorusi pan prezydent jest również ich prezydentem. I za to serdecznie dziękuję" Анжэліка Борыс: "Менавіта пагэтаму так важнай з'яўляецца падтрымка прэзідэнта Рэчыпаспалітай, бо ДЛЯ МНОГІХ ПАЛЯКАЎ У БЕЛАРУСІ ПАН ПРЭЗІДЭНТ З'ЯЎЛЯЕЦЦА АДНАЧАСОВА ІХ ПРЭЗІДЭНТАМ. За гэта сардэчна дзякую."
Каб пакінуць каментар, калі ласка, актывуйце JavaScript у наладах свайго браўзеру