Тры жыхары Гомеля асуджаны ўмоўна за незаконны адстрэл зайцоў
За незаконны адстрэл трох зайцоў тры жыхары Гомеля прыгавораны да пазбаўлення волі на паўтара гады ўмоўна з адтэрміноўкай выканання прысуду на год. У іх канфіскаваны аўтамабіль «Фальксваген‑Пасат».
Такое рашэнне прыняў 22 лютага суд Гомельскага раёна.
Суд таксама абавязаў браканьераў кампенсаваць урон у памеры больш як мільён рублёў.
Як паведаміў начальнік Гомельскай абласной інспекцыі аховы жывёльнага і расліннага свету пры прэзідэнце Беларусі Вячаслаў Рогаль, тры жыхары Гомеля і Гомельскага раёна былі затрыманы 30 кастрычніка падчас сумеснага рэйду інспекцыі і егерскай службы Беларускага таварыства паляўнічых і рыбаловаў.
Браканьеры палявалі ў начны час на зайцоў каля вёскі Старыя Дзятлавічы Гомельскага раёна, выкарыстоўваючы незарэгістраваную зброю, аўтамабіль і асвятляльныя прыборы. Яны здабылі трох зайцоў, урон быў ацэнены ў 1 млн. 50 тыс. рублёў.
У дачыненні да браканьераў была распачата справа на падставе ч. 4 арт. 282 КК (незаконнае паляванне, якое ўчынена з выкарыстаннем механічнага наземнага, воднага або паветранага транспартнага сродку або якое мела вынікам нанясенне ўрону ў асабліва буйным памеры).
Каментары