Някляеў прэзентаваў грамадзянскую кампанію «Гавары праўду»
Яе заснавальнікамі выступілі Бураўкін, Барадулін, Зінаіда Бандарэнка, Грушавы, шахматыст Купрэйчык, Таццяна Процька.
25 лютага быў дадзены старт грамадзянскай кампаніі «Гавары праўду».Яе заснавальнікамі выступілі пісьменнікі Рыгор Барадулін, Генадзь Бураўкін, народная артыстка Беларусі Зінаіда Бандарэнка, заснавальнік фонда «Дзеці Чарнобыля» Генадзь Грушавы, шахматыст Віктар Купрэйчык, акадэмік Радзім Гарэцкі, праваабаронца Таццяна Процька. Лідэрам абраны пісьменнік Уладзімір Някляеў.
Прэзентацыя грамадзянскай кампаніі прайшла ў мінскім гатэлі «Краун Плаза». Яшчэ перад пачаткам імпрэзы Някляеў і Бураўкін падпісвалі ўсім ахвочым свае тамы з серыі «Беларускі кнігазбор». Выданне выбраных твораў Някляева выйшла з друкарні якраз у гэтым дзень.
«Калі б не было гэтай прэзентацыі, то дзень бы склаўся ў мяне зусім па‑іншаму», — жартаўліва зазначыў пісьменнік.
Прэс‑сакратар кампаніі Юлія Рымашэўская зазначыла, што на мерапрыемства запрашаліся не толькі недзяржаўныя журналісты, але і афіцыйныя. Аднак з’явіліся толькі першыя. «Спадзяюся, што з часам гэтым зацікавяцца абодва бакі», — заявіла Ю.Рымашэўская.
Перш наперш Някляеў зачытаў зварот ініцыятыўнай групы. «Усведамляючы ману, як небяспеку для існавання нацыі, мы пачынаем агульнанацыянальную кампанію «Гавары праўду!». Каб па праўдзе жыць, трэба праўду казаць. Гэта цяжка, але давайце паспрабуем».
«Распачатая намі кампанія не з’яўляецца палітычнай. Гэта маральная акцыя, — кажа У.Някляеў. — Я неаднойчы спрабаваў стварыць падобны рух, арганізацыю, якая б мела на мэце не палітыку, а культуру».
Ён узгадаў няўдалыя спробы арганізацыі фонду «Разам», а таксама «Беларускага дома». Але тады, кажа Някляеў, ён сутыкаўся з супрацівам не толькі ўладаў, але і апазіцыі. «Бо яны палічылі, што мы топчымся на іхняй дзялянцы», — кажа паэт. «Гавары праўду» створанае ў абыход любых палітычных арганізацый.
Па ягоных словах, мэтай кампаніі ёсць данясенне да беларускага грамадства рэальнага становішча ў краіне. Сярод першых ініцыятываў грамадзянскай кампаніі — гэта данясенне праўдзівай сітуацыі, якая склалася з беспрацоўем.
Таксама выпушчана 200 тысяч паштовак, якія можна накіроўваць у Адміністрацыю прэзідэнта, напісаўшы «праўду пра важную праблему, каб яе можна было пачаць вырашаць».Паштоўкі, дарэчы, выйшлі на расійскай мове.
Генадзь Грушавы зазначыў, што гэтай кампаніяй яны працягваюць тую справу, якую больш за 20 гадоў таму пачыналі Алесь Адамовіч, Васіль Быкаў, Васіль Несцярэнка.
Пацікавіліся ў Някляева, ці збіраецца ён вылучацца ў прэзідэнты. Не, адказаў лідэр кампаніі. Ён расказаў, што да яго сапраўды звярталіся
«нябедныя людзі, каб ён вылучаўся кандыдатам», аднак пісьменнік адмовіўся. Што гэта за людзі? Гэта беларусы, якія вымушаныя былі з’ехаць з краіны, і жывуць пераважна ў Расіі.
«Потым я падумаў, што гэтыя людзі будуць шукаць іншага чалавека, і ўсё адно знойдуць. Я звярнуўся да іх з падобнай непалітычнай ініцыятывай. Спачатку яны адмаўляліся, казалі, што гэта дысідэнцтва. Аднак, я стукаў і ўсё ж дастукаўся да іх», — сказаў У.Някляеў.
Тым не менш, было зазначаны, «калі кампанія пойдзе паспяхова, то яна будзе ўплываць на выбарчую кампанію».
Першыя вынікі кампаніі заснавальнікі абяцаюць падвесці ўжо праз месяц. Яны сцвярджаюць, што на бліжэйшы год у іх ёсць канкрэтны план дзеянняў.
Пра тое, што са сродкамі ў кампаніі ўсё ў парадку, можа сведчыць і той факт, што на фуршэце пасля прэзентацыі частавалі дарагімі гатункамі сыра, а таксама чырвонай ікрой.
Каментары