Сёньня ў менскім Палацы мастацтваў а 18‑й вечара адбудзецца сьвяточная імпрэза «Зьбіраўся скарб: 50 тамоў «Беларускага кнігазбору». У 1996 годзе выйшаў першы том праекту — «Выбраныя творы» Яна Чачота, а нядаўна ўжо 50‑я кніга — творы Максіма Гарэцкага.

Ініцыятыва стварэньня кніжнага праекту «Беларускі кнігазбор» належыць пісьменьніку Кастусю Цьвірку, які быў апантаны, здавалася б, невыканальнай марай — выдаць у 200‑х тамах усё найлепшае зь беларускай літаратуры. У 1995 годзе інтэлігенцыя стварыла Міжнародны фонд «Беларускі кнігазбор», і ў наступным годзе выдалі ўжо Яна Чачота.

Згадвае Кастусь Цьвірка: «На самым пачатку нашай дзейнасьці хацелася як найболей выдаць кніг. Але як гэта зрабіць — ніякага ўяўленьня не было. Таму што пачыналі мы з нуля, ніякіх сродкаў не было. Але была вера і жаданьне вялікае. І гэта намі рухала».

Плян‑каталёг «Беларускага кнігазбору» прадугледжвае выданьне кніг у трох падсэрыях: «Мастацкая літаратура», «Гістарычна‑літаратурныя помнікі» і «Пераклады замежнай клясыкі». На сёньняшні дзень выйшла 12 кніг з так званай «зялёнай» сэрыі «Помнікаў», 2 тамы зь перакладной сэрыі (Дастаеўскі і Гётэ) і астатнія 36 кніг — мастацкая літаратура. Прычым выдаюцца ня толькі клясыкі.

Нядаўна ў сэрыі «Беларускі кнігазбор» выйшлі тамы нашых сучасьнікаў Ніла Гілевіча, Генадзя Бураўкіна, Уладзімера Някляева.

У найбліжэйшых плянах «Кнігазбору» — «Выбранае» Міколы Ермаловіча, Паўла Шпілеўскага, Міколы Нікіфароўскага, Адама Багдановіча.

Сёньня ўвечары ў Палацы мастацтваў шчырыя словы пра «Беларускі кнігазбор» скажуць акадэмік Радзім Гарэцкі, прафэсар Адам Мальдзіс, заслужаны артыст Беларусі Віктар Скорабагатаў, паэты Генадзь Бураўкін, Анатоль Вярцінскі, Уладзімер Някляеў. На вечарыне выступяць Лявон Вольскі, трыё «Вытокі», Тацяна Беланогая. Уваход вольны.

Палац мастацтваў (Мінск, вул. Казлова, 3), 17 сакавіка, 18:00.