17.03.2010 / 13:47

Янка Купала і Гародня з пошты Рэдакцыі 1

Гродзенскі дзяржаўны універсітэт невыпадкова носіць імя класіка беларускай літаратуры Янкі Купалы. Горад цесна звязаны з яго жыццёвым шляхам і творчасцю.

Гродзенскі дзяржаўны універсітэт невыпадкова носіць імя класіка беларускай літаратуры Янкі Купалы. Горад цесна звязаны з яго жыццёвым шляхам і творчасцю.

Паэт неаднойчы бываў у Гародні. Дата апошняй паездкі дакладна вядомая — 27—28 сакавіка 1941 года. Пра гэта сведчаць успаміны Васіля Віткі «Сустрэчы, якія зберагла памяць».

А ўпершыню пра паэта пачулі тут сто гадоў таму. Дзякуючы культурна-асветнай дзейнасці Гродзенскага гуртка беларускай моладзі (1910—1913), які актыўна прапагандаваў беларускую культуру, шырокай грамадзе гарадзенцаў былі прапанаваны яго творы. На вечарынах чыталіся вершы Янкі Купалы, выконваліся песні на яго словы. Пра гэта сведчаць і ўспаміны дзяячкі гуртка Зоські Верас.

Вучні першай беларускай школы ў Гародні, што паўстала ў 1916 годзе, вывучалі творы Янкі Купалы. Школа месцілася на вуліцы Маставой, 9 пры Барысаглебскім манастыры. А настаўнічалі ў ёй Тэкля Станішэўская і Аляксандр Грыкоўскі.

У 1919 годзе падчас дзейнасці Драматычнага гуртка Грамады беларускай моладзі 19 верасня ўпершыню ў Гародні быў пастаўлены спектакль па п’есе «Паўлінка», у якім галоўную ролю выконвала Паўліна Мядзёлка.

Асобная старонка культурнага жыцця горада звязана з дзейнасцю Гродзенскага абласнога драматычнага тэатра, у рэпертуары якога перыядычна з’яўляюцца творы класіка. Сёння гэта два спектаклі — «Раскіданае гняздо» і «Прымакі». Два спектаклі паводле Купалавых твораў з поспехам ідуць на сцэне Гродзенскага абласнога тэатра лялек — п’еса «Тутэйшыя» і «Паэма без слоў» (паводле драматычнай паэмы «Сон на кургане»).

Вобраз паэта заўсёды натхняў гарадзенскіх творцаў на стварэнне вершаў. Пачынальнікам прынёманскай паэтычнай купаліяны стаў Міхась Васілёк. Пісьменніцы Зінаідзе Бандарынай, што з’яўляецца аўтаркай кнігі пра Купалу «Ой, рана на Івана…» і нарыса «Па купалаўскіх мясцінах», належыць верш «Па купалаўскіх сцежках». Некалькі вершаў прысвяцілі народнаму паэту Данута Бічэль, Юрка Голуб, Анатоль Брусевіч.

У Гродзенскім педінстытуце ў 1958—1965 гадах штогод праводзіліся Купалаўскія чытанні. Яны былі адноўлены як навуковая канферэнцыя ў 1995, якая раз на два гады збірае купалазнаўцаў у Гародню. Чарговая канферэнцыя прайшла сёлета 24—25 лютага. На ёй прагучала ажно 89 дакладаў.

Ала Петрушкевіч

0
More Air / Адказаць
07.04.2010 / 11:52
Як для мяне, як раз выпадкова. Можа не зусім так, як Брэсцкі мае імя Пушкіна, але падобна на тое. Пры чым Купала да ўніверсітэту, ды яшчэ ў Горадні?
Каб пакінуць каментар, калі ласка, актывуйце JavaScript у наладах свайго браўзеру