22.03.2010 / 23:22

Беларусь і Бразілія створаць гандлёва-эканамічную камісію і адкрыюць пасольствы 2

Беларусь у супрацоўніцтве з Бразіліяй разлічвае выйсці на федэральны ўзровень, заявіў Лукашэнка ў Рыо-дэ-Жанейра на сустрэчы з прэзідэнтам Лулам да Сілвам.

Беларусь у супрацоўніцтве з Бразіліяй разлічвае выйсці на федэральны ўзровень, заявіў Аляксандр Лукашэнка 22 сакавіка ў Рыо-дэ-Жанейра на сустрэчы з прэзідэнтам Луісам Інасіу Лулам да Сілвам.

«Мы б хацелі, каб вы зрабілі даручэнне свайму ўраду, міністрам, каб і яны зацікаўлена аднесліся да нашых прапаноў, і мы знайшлі б кропкі судакранання на федэральным узроўні», — сказаў Лукашэнка, словы якога прыводзіць прэс-служба беларускага кіраўніка.

Ён адзначыў, што Беларусь бачыць для сябе вялікае поле дзейнасці ў Бразіліі,

асабліва ў сувязі з прынятай праграмай развіцця сельскай гаспадаркі.

Сустрэча прэзідэнтаў «дазволіла вызначыць асноўныя кірункі, якія цікавяць абодва бакі, у развіцці супрацоўніцтва». Перадусім, «гэта сферы, якія садзейнічаюць развіццю буйной сельскагаспадарчай вытворчасці, напрыклад, пастаўкі тэхнікі з усім спадарожным абсталяваннем». Акрамя таго, бразільскі бок цікавіць стварэнне зборачных вытворчасцяў: гэта могуць быць трактары і сельскагаспадарчае абсталяванне. «Сур'ёзная зацікаўленасць» праяўлена да магчымасці паставак вялікагрузнай кар'ернай тэхнікі, самазвалаў БелАЗ.

Бразілія «зацікаўлена ў далейшых пастаўках калійных соляў з Беларусі».

«Наша краіна ўжо валодае трэццю бразільскага рынку па пастаўках калійных угнаенняў, і гэта супрацоўніцтва будзе прадоўжана», — адзначаецца ў паведамленні.

Бакі дамовіліся, што будзе створана двухбаковая гандлёва-эканамічная камісія, якая сваю першую сесію правядзе ў Мінску.

Прэзідэнт Бразіліі вітаў заяву Лукашэнкі пра намер адкрыць беларускае пасольства ў яго краіне. Бразілія таксама адкрые пасольства ў Мінску.

Лукашэнка пацвердзіў удзел Беларусі ў III форуме «Альянс цывілізацый», які пройдзе ў Рыо-дэ-Жанейра ў маі і ўпершыню наладжваецца за межамі еўрапейска-міжземнаморскага рэгіёну.

Па выніках сустрэчы прэзідэнты прынялі сумесную дэкларацыю.

У прыватнасці, яны дамовіліся «пачаць перамовы для больш хуткага падпісання міжнародных дагавораў аб супрацоўніцтве ў галіне гандлёва-эканамічнага ўзаемадзеяння, сельскай гаспадаркі, інвестыцый, навукі і тэхналогій, культуры, адукацыі, спорту і турызму», «актывізаваць узаемны абмен візітамі дэлегацый дзелавых колаў». Бакі «віталі стварэнне зборачнай вытворчасці беларускай сельскагаспадарчай тэхнікі ў штаце Гояс». Прэзідэнт Бразіліі «падкрэсліў цікавасць бразільскага боку да нарошчвання і дыверсіфікацыі экспартных паставак прадуктаў харчавання ў Беларусь, уключаючы сою і мяса, і павелічэння аб'ёмаў гандлю ўгнаеннямі».

Прэзідэнты «пацвердзілі цікавасць сваіх дзяржаў да супрацоўніцтва ў мэтах умацавання энергетычнай бяспекі, выкарыстання альтэрнатыўных і ўзнаўляльных крыніц энергіі». Яны дамовіліся развіваць двухбаковае супрацоўніцтва ў сферы вытворчасці біяпаліва, маючы на ўвазе перадавы бразільскі вопыт у выпуску і выкарыстанні этанолу і біядызельнага паліва.

Прэзідэнты «віталі ўсе намаганні, скіраваныя на больш хуткае пераадоленне міжнароднага фінансава-эканамічнага крызісу», і адзначылі важнасць кансалідацыі Групы-20 як ключавога форуму міжнароднага фінансава-эканамічнага супрацоўніцтва ў гэтых мэтах. Адначасова яны пацвердзілі сваю падтрымку «шматбаковай сістэме гандлю».

0
Homo habilis / Адказаць
23.03.2010 / 02:13
Сёньня даведаўся, што пасьля рэабілітацыі заслужаны зьнішчальнік Горадні Саўчанка паедзе служыць Беларусі амбасадарам у Вільню. А хто ж у Бразілію, дзе многа дзікіх абезьян?
0
Алег / Адказаць
23.03.2010 / 15:23
Гэта выдатна! Цяпер, спадзяюся, у славуты бразілійскі карнавал будзе ўлучаны Танец з карабінамі "Пацешнага палку" УС РБ. І вельмі спадзяюся, ён адгэтуль стане тамака гваздом праграмы! Але пры адной умове: што туды не паедуць нашы ролерныя лыжнікі ў вязаных каптурыках і... са стрэльбамі наперавес. :))
Каб пакінуць каментар, калі ласка, актывуйце JavaScript у наладах свайго браўзеру