30.03.2010 / 15:57

БАЖ прыняла рашэнне спыніць дзейнасць Цэнтра прававой абароны СМІ 3

Спынена дзейнасць Цэнтра прававой абароны СМІ пры грамадскім аб’яднанні »Беларуская асацыяцыя журналістаў» (БАЖ). Такое рашэнне прынята 30 сакавіка на пасяджэнні рады БАЖ у Мінску.

Рашэнне было прынята ў мэтах выканання папярэджання Міністэрства юстыцыі, вынесенага арганізацыі 13 студзеня 2010 года. Мінюст палічыў, што работа Цэнтра прававой абароны СМІ пры БАЖ не прадугледжана статутам грамадскага аб’яднання. Акрамя таго, на думку Мінюста, задачы гэтага фарміравання, выкладзеныя ў палажэнні аб ім, выходзяць за межы статутных задач ГА «БАЖ».

БАЖ паспрабаваў абскардзіць папярэджанне ў Вярхоўным судзе. Аднак суд не задаволіў іск БАЖ аб адмене папярэджання і 22 сакавіка абавязаў арганізацыю выправіць парушэнні, выкладзеныя ў папярэджанні Мінюста.

Акрамя таго, рада грамадскай арганізацыі прыняла рашэнне

лічыць пасведчанні членаў БАЖ з надпісам «прэса» на вокладцы ўзору 2003 года несапраўднымі з 22 сакавіка 2010 года.

Гэта таксама патрабаванне Мінюста, выкладзенае ў папярэджанні.

Як паведаміў на пасяджэнні рады намеснік старшыні БАЖ Андрэй Бастунец, Мінюст запатрабаваў забяспечыць адабранне прызнаных несапраўднымі пасведчанняў БАЖ з надпісам «прэса» і забяспечыць далейшую немагчымасць іх выкарыстання. »Шчыра кажучы, я не ўяўляю, як гэта можна зрабіць, бо членаў БАЖ больш за тысячу. Грамадская арганізацыя не мае сілавой структуры, як, напрыклад, інстытут судовых прыставаў, якія таксама часам гадамі не могуць выканаць пастановы суда. Таму мы, хутчэй за ўсё, размесцім аб’яву аб прызнанні несапраўднымі пасведчанняў узору 2003 года ў часопісе «Абажур», газетах «Рэспубліка» і «Народная воля», а таксама на сайце www.baj.by«, — адзначыў Бастунец.

Акрамя таго, згодна з папярэджаннем, на сайце БАЖ будзе выпраўлена «візітка» арганізацыі і прыведзена ў адпаведнасць са статутам арганізацыі.

«Такім чынам мы выправім усе недалікі, якія былі выкладзены ў прэтэнзіях Мінюста», — сказаў Бастунец.

0
Жур-фак / Адказаць
30.03.2010 / 17:55
"...мы выправім усе недалікі...".Сумна спадарства. Сумна!
0
Dzjadulja / Адказаць
30.03.2010 / 18:24
«выправім усе недалікі, якія былі выкладзены ў прэтэнзіях Мінюст» ---> Ці дарэчна называць “недалікамі” тое, што аб'ектыўна імі ня ёсьць? Відавочна, што патрабаваньні Мінюста -- штучныя, палітычна заангажаваныя, повад “зачапіцца” да “нячэснай” арганізацыі. І тыя аспэкты дзейнасьці БАЖ, якія Мінюст патрабаваў зьмяніць, ня варта з гэтай толькі прычыны самім ацэньваць як “недалікі”.
0
Чалавек / Адказаць
31.03.2010 / 11:45
БАЖ пераўтвараецца ў абажур для Лукі. Сумна :(
Каб пакінуць каментар, калі ласка, актывуйце JavaScript у наладах свайго браўзеру