Тэма незалежнасьці Беларусі зноў трапіла ў эпіцэнтар грамадзкай увагі. Спачатку Аляксандар Мілінкевіч выступіў з зваротам да беларускага народу, у якім папярэдзіў пра небясьпеку правядзеньня рэфэрэндуму пра «канстытуцыйны акт саюзнай дзяржавы». Мілінкевіч піша, што фактычна ставіцца пытаньне, ці будзе існаваць Беларусь.

Ён малюе нярадасную пэрспэктыву, якая чакае беларусаў у выпадку далейшай інтэграцыі з Расеяй: «Аб’яднаемся – і нашы дзеці будуць ваяваць у Чачні, і скупяць нашыя прадпрыемствы і зямлю іхнія алігархі, і прыйдуць да нас іхнія мафія і злачынцы, і станем мы глыбінкай Расеі, дзе жывуць куды бядней, чым сёньня ў нас». Мілінкевіч не называе крыніцаў, зь якіх ён мае зьвесткі пра пагрозу беларускай незалежнасьці.

5 верасьня Партыя БНФ прапанавала правесьці форум «За незалежнасьць», старшынём аргкамітэту якога меркавана будзе менавіта Аляксандар Мілінкевіч. Старшыня ПБНФ Вінцук Вячорка адзначыў, што правядзеньне форуму магчымае ўжо пры канцы кастрычніка, а яго асноўнымі мэтамі будзе кансалідацыя ўсіх незалежніцкіх сілаў. Вячорка гаворыць, што пытаньне аб магчымым рэфэрэндуме ніколі не здымалася з парадку дня ў аб’яднанай апазыцыі. Разам з тым ён ня змог уцямна патлумачыць, чаму правядзеньне форуму заплянаванае менавіта зараз.

У аўторак інфармацыйнае агенцтва БелаПАН паведаміла, што падчас працы форуму «За незалежнасьць» можа быць утвораны і аднаіменны блёк на чале з тым жа Аляксандрам Мілінкевічам. У такім разе гэта будзе свайго роду кампэнсацыя за так і ня створаны Рух «За Свабоду».

Не сакрэт, што ён не паўстаў праз сабатаж партыйных лідэраў, што баяліся аслабленьня сваіх пазыцый. У колах блізкіх да Мілінкевіча спадзяюцца, што больш вольная форма блёку знойдзе згоду Вячоркі, Статкевіча, Палевіковай ды іншых партыйцаў.

Намесьнік старшыні ПБНФ Аляксей Янукевіч пацьвердзіў, што перамовы аб стварэньні такога блёку ўжо пачаліся й будуць весьціся з рознымі сіламі: ад КХП-БНФ да сацыял-дэмакратаў.

Пакуль цяжка даць адназначны адказ, наколькі прадстаўнічым будзе форум «За незалежнасьць». Адзін зь лідэраў АГП Аляксандар Дабравольскі ўранку ў сераду яшчэ ўвогуле нічога ня чуў пра гэтую ідэю.

Хочаш падзяліцца важнай інфармацыяй ананімна і канфідэнцыйна?