«Каб гэты здымак зрабіць, трэба ўсе будынкі на тры кіламетры знесці»
Генадзю Мацуру — 50.
Сёння спаўняецца 50 гадоў найлепшаму кніжнаму дызайнеру Беларусі Генадзю Мацуру.
Мы знаёмыя з ім больш за 14 гадоў. Нас пазнаёміла Валянціна Андрэеўна Трыгубовіч, якая цяпер пажыццёва асуджаная атрымліваць «камісійныя» — кнігі выдавецтва «Лімарыус», аформленыя Мацурам.
Я прыйшоў да яго ў «Графему», што месцілася тады ў будынку Міністэрства інфармацыі. Мяне сустрэў калючы, як вожык, малады мужык з дэманстратыўным бел‑чырвона‑белым значком на лацкане пінжака. Калючасць і дэманстратыўнасць былі, як я разумею, прадыктаваныя тым, што ён добра ведаў, хто яму патэлефанаваў. Я быў «той самы Фядута, які…» Ну — і гэтак далей.
Я прывык. Так я знаёміўся і з Валянцінам Голубевым, і з Валянцінай Трыгубовіч, і з Верай Чуйко, і з многімі іншымі выдатнымі людзьмі, сяброўствам з якімі я ганаруся.
Ганаруся я і тым, што сябрую з Генадзем Іванавічам Мацурам. Ганаруся — таму што найлепшыя мае кнігі — «Паэтычны аглядальнік», «Лісты мінулага часу», «Вільня 1823–1824», альманах «Асоба і час» — афармляў — адзяваў, спавіваў, упрыгожваў, выпускаў у свет — Генадзь Іванавіч.
І першую маю кнігу — «Чытач у творчай свядомасці
Калі мы прыдумалі «Вільню», то вырашылі ў Вільню і з’ездзіць. Была ідэя: сфатаграфаваць дворык Віленскага універсітэта і змантаваць яго з тым каляровым малюнкам, які ўсім спецыялістам па хранатопе кнігі добра вядомы.
Прыехалі. Паглядзелі. Мацур сваім тэнарком — меланхалічным, як заўсёды, заўважыў:
— А дарма прыехалі… Каб гэты здымак зрабіць, трэба ўсе будынкі на тры кіламетры знесці… Толькі тады патрэбная перспектыва будзе…
Лёгка сказаць — знесці на тры кіламетры! Акурат на гэтых трох кіламетрах размешчаны палац прэзідэнта Літоўскай Рэспублікі. Як яго знесці?
…
І паехалі мы дадому як аблізаўшыся.
Праўда, вокладку Мацур зрабіў, як заўсёды, геніяльную.
І яшчэ.
Калі вы, дарагі чытач, бераце ў рукі «Кон» Някляева або «Ксты» Барадуліна, кнігі «Бібліятэкі Свабоды», у тым ліку шыкоўны «Сямейны альбом» Мудрова і «Дуліну ад Барадуліна», і дзве цэглы шапранаўскай біяграфіі Быкава, і мікалаеўскую «Гісторыю беларускай кнігі» — гэта таксама Генадзь Іванавіч рабіў.
Кніжная паліца Генадзя Мацура працягваецца…
Ад Рэдактара. Мала хто ведае, што менавіта Генадзь Мацур — аўтар дызайна сённяшняй папяровай газеты «Наша Ніва».
Цяпер чытаюць
Беларусам стала складаней легалізавацца ў Польшчы — там больш не прымаюць выдадзеныя ў БССР дакументы і патрабуюць апастылі48
Каментары