У Цэнтрвыбаркам 14 красавіка перададзены дакументы на рэгістрацыю ініцыятыўнай групы па правядзенні рэферэндуму супраць павелічэння мытных пошлін на аўтамабілі.
Ініцыятарам рэферэндуму выступіла Партыя БНФ. Як паведаміў яе лідэр Аляксей Янукевіч, у склад ініцыятыўнай групы ўвайшлі 122 чалавекі з усіх абласцей краіны і Мінска. На рэферэндум выносіцца пытанне: «Ці падтрымліваеце вы захаванне памеру мытных пошлін на ўвоз у Рэспубліку Беларусь легкавых аўтамабіляў замежнай вытворчасці на ўзроўні 26 лістапада 2009 года?»
На працягу месяца Цэнтрвыбаркам павінен правераць законнасць стварэння ініцыятыўнай групы і прыняць рашэнне адносна яе рэгістрацыі. Рашэнне ЦВК будзе выносіць з улікам заключэння Міністэрства юстыцыі аб тым, ці можа гэтае пытанне разглядацца на рэспубліканскім рэферэндуме.
У выпадку рэгістрацыі ініцыятыўнай групы рэферэндум можа прайсці ў чэрвені 2010 года.
Ініцыятыва правядзення рэспубліканскага рэферэндуму па пытанні павышэння мытнай пошліны на аўтамабілі была выстаўлена Партыяй БНФ у снежні 2009 года.
У кіраўніцтве партыі лічаць, што пагадненне аб стварэнні Мытнага саюза, падпісанае 27 лістапада 2009 года ў Мінску кіраўнікамі Беларусі, Казахстана і Расіі, «ігнаруе інтарэсы значнай часткі грамадзян Беларусі, для якіх уваходжанне ў сілу падпісаных дакументаў пацягне пагаршэнне асабістага матэрыяльнага дабрабыту ў сувязі са значным павышэннем мытных тарыфаў і, адпаведна, цэн на важныя катэгорыі тавараў, у прыватнасці на легкавыя аўтамабілі».
Пакуль павышэнне пошлін закранула юрыдычныя асобы і індывідуальных прадпрымальнікаў. З новага года пошліны даведзены да ўзроўню расійскіх, на некаторыя імпартныя аўтамабілі яны павялічыліся ў 10 разоў.
Для фізічных асоб у межах Мытнага саюза новыя правілы ўвозу аўтамабіляў пакуль не вызначаны. Чакаецца, што пошліны на ўвоз транспартных сродкаў фізасобамі павысяцца 1 ліпеня 2010 года, калі павінен набыць моц Мытны кодэкс і запрацаваць у поўным аб`ёме Мытны саюз Беларусі, Казахстана і Расіі.
Раней Янукевіч заявіў, што ініцыятыўная група зможа сабраць больш за мільён подпісаў грамадзян у падтрымку рэферэндуму, а не толькі неабходныя паводле закону 450 тыс.
Н яго думку, адмова ў рэгістрацыі ініцыятыўнай групы будзе сведчыць пра нежаданне ўладаў абараняць інтарэсы насельніцтва.
