8 верасьня рада РГА «Беларускі ПЭН-Цэнтар» на сваім паседжаньні прыняла дзьве заявы наконт унясеньня зьменаў у «Правілы артаграфіі і пунктуацыі» і заяву «Аб мове выкладаньня гісторыі Беларусі і геаграфіі Беларусі».

Аб унясеньні зьменаў у «Правілы артаграфіі і пунктуацыі»

Выклікае зьдзіўленьне і занепакоенасьць інфармацыя дзяржаўных сродкаў масавай інфармацыі аб хуткіх зьменах у дзейныя «Правілы артаграфіі і пунктуацыі».

Ажыцьцяўленьне рэформы фактычна даручана асобам і ведамствам, якія пазьбягаюць карыстаньня беларускай мовай і маюць дачыненьне да яе выцясьненьня з усіх сфэраў грамадзкага жыцьця.

Правапісная рэформа ажыцьцяўляецца без належнай у такіх выпадках навуковай экспэртызы і дыскусіі. Між тым, у 1926 годзе праблеме рэфармаваньня беларускай мовы была прысьвечаная міжнародная канфэрэнцыя з удзелам вядомых эўрапейскіх мовазнаўцаў.

Лічым неабходным склікаць міжнародную канфэрэнцыю з папярэднім шырокім грамадзкім абмеркаваньнем праекту рэформы правапісу.

Аб мове выкладаньня гісторыі Беларусі і геаграфіі Беларусі

З афіцыйных дакумэнтаў Міністэрства адукацыі стала вядома, што з новага навучальнага году выкладаньне гісторыі Беларусі і геаграфіі Беларусі ў сярэдніх адукацыйных школах фактычна пераводзіцца на расейскую мову.

РГА «Беларускі ПЭН-Цэнтар» лічыць гэта парушэньнем моўнага раўнапраўя і чарговым крокам, скіраваным на выцясьненьне беларускай мовы са сфэры адукацыі.