«Народы Кыргызстана і Беларусі перажывуць пытанне Курманбека Бакіева, і гэта ніякім чынам не адаб’ецца на нашых адносінах», — заявіў БелаПАН кіраўнік апарата часовага ўрада Кыргызстана Эдыль Байсалаў, каментуючы ўчарашнюю заяву Аляксандра Лукашэнкі.
4 мая ў інтэрв’ю агенцтву Рэйтэр прэзідэнт Беларусі заявіў, што не збіраецца выдаваць Бакіева новым уладам Кыргызстана. «Да мяне ніхто афіцыйна не звяртаўся, — сказаў Лукашэнка. — Але адразу хачу афіцыйна заявіць: гэтыя звароты будуць бескарысныя і зневажальныя для часовага ўрада. Прэзідэнт Кыргызстана знаходзіцца пад абаронай беларускай дзяржавы і прэзідэнта. Не трэба гэтак званаму часоваму ўраду звяртацца з патрабаваннем выдаць Бакіева. Каму выдаць? Ці захачу я яшчэ гутарыць з тымі, хто сёння ва ўладзе ў Кіргізіі».
«Гэта права беларускага кіраўніцтва — не выдаваць Бакіева, — заявіў, у сваю чаргу, Байсалаў. — Але пазіцыя Кыргызстана застаецца нязменнай: Бакіеў з’яўляецца дыктатарам, які узурпаваў уладу, а ўвесь свет назіраў за расстрэлам мірнай дэманстрацыі.
Але мы не збіраемся сварыцца з народам Беларусі з‑за крывавага дыктатара».
Паводле слоў Байсалава, Кыргызстан »паважае суверэннае права Беларусі прадастаўляць сваю тэрыторыю для трэціх асоб». «Але мы разлічваем, што гасціннасцю беларускага народа не будуць злоўжываць, з тэрыторыі Беларусі не будзе зыходзіць пагроза стабільнасці і аднаўленню палітычнага і сацыяльна‑эканамічнага жыцця Кыргызстана», — падкрэсліў ён.
Кіраўнік апарата часовага ўрада таксама заявіў, што накіраванне запыту беларускаму боку аб выдачы Бакіева — гэта чыста тэхнічнае пытанне.
«Рана ці позна запыт будзе зроблены», — сказаў Байсалаў.
4 мая часовы ўрад Кыргызстана пазбавіў адхіленага ад улады прэзідэнта Курманбека Бакіева прэзідэнцкай недатыкальнасці і даручыў Генеральнай пракуратуры забяспечыць яго экстрадыцыю. Адпаведны дэкрэт падпісала кіраўнік Кабінета міністраў Роза Атунбаева. У дэкрэце ўказана, што »Бакіеў дапусціў расстрэл мірных грамадзян і тым самым сам пазбавіў сябе статусу экс‑прэзідэнта і недатыкальнасці».
