Завяршаецца акцыя «Задай пытанне прэзідэнту» 10

25-га траўня завершыцца акцыя БРСМ «Задай пытанне прэзідэнту».

Ад 14-га красавіка ў навучальных установах па ўсёй краіне былі выстаўленыя адмысловыя скрынкі, куды ўсе жадаючыя маглі апускаць лісты да кіраўніка Беларусі з цікавячымі іх пытаннямі.

Паводле правілаў акцыі, змест пытанняў спачатку маюць вывучыць актывісты БРСМ, і ўжо толькі пасля гэтага яны трапяць у Адміністрацыю прэзідэнта.

«НН» датэлефанавалася да ЦК БРСМ, каб высветліць падрабязнасці правядзення акцыі.

«Канешне ж, мы не будзем перадаваць усе лісты ў адміністрацыю. Толькі частку»,

 — паведаміла суразмоўца, якая пажадала застацца невядомай. І дадала, што пакуль у ЦК БРСМ не ведаюць, калі змогуць накіраваць пытанні навучэнцаў школ і ВНУ краіны прэзідэнту. «Вы ж разумееце, нам патрэбен час, каб апрацаваць усе лісты. Іх, напэўна, будзе шмат», — адзначыла супрацоўніца ЦК БРСМ ў размове з «НН».

АП

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ