16 верасня у Віцебску планавалі правесці фестываль паветраных змеяў «Свята ветру».
Гэты фэст нарадзіўся стыхійна некалькі гадоў таму. Творчая моладзь і студэнты ладзілі яго двойчы на год – увесну ды ўвосень – за горадам, на так званай Касцюковай гары, невялічкай пустцы побач з закінутай воданапорнай вежай. Аніякай палітычнай афарбоўкі «Свята ветру» ніколі не мела. Моладзь збіралася, каб павыхваляцца самаробнымі змеямі, пагуляць, а часам і падурэць, як у дзяцінстве. З цягам часу фэст набываў усё большую папулярнасць. У суботу да Касцюковай гары з’ехаліся каля паўтары сотні чалавек з паветранымі змеямі, гітарамі ды папяровымі крыламі. А на гары іх сустрэлі супрацоўнікі міліцыі.
Міліцыянты прапанавалі моладзі разысціся па хатах, пагражаючы штрафам у 50 базавых велічынь. На пытанне «чаму?» канстатавалі, што фэст з’яўляецца несанкцыяваным мерапрыемствам у… грамадскім месцы. Каб яго правесці, трэба было падаць заяву ў выканкам за два тыдні, атрымаць дазвол, арганізаваць пажарную бяспеку ды магчымасць медычнай дапамогі. Ўсіх, хто хацеў прыняць удзел у «Свяце ветру», міліцыянты адзнялі на відэа. Памкнуліся агледзець рэчы ў некаторых з прысутных, але не знайшлі ні спіртнога, ні забароненай сімволікі. У прыватнай размове адзін з міліцыянтаў параіў хлопцам і дзяўчатам адпачываць у горадзе і не збірацца такім натоўпам.
Ядвіга Сташэўская, Еўрарадыё, Віцебск
Фота часопіса «Идиот»
❏
Глядзі яшчэ:
Фотарэпартаж з забароненага сьвята на «Народных навінах Віцебску»
Як праходзіла сьвята ветру ў 2005-м годзе. Фотасправаздача часопіса «Идиот»
