ЗША, 2010, каляровы, 124 хв.
Рэжысёр: Дэвід Слэйд
Ролі выконваюць: Крыстэн Сцюарт, Робэрт Пэцісан, Тэйлар Лотнэр, Білі Бэрк, Эшлі Грын, Джэксан Рэтбоўн
Жанр: Падлеткавая мыльная опера, замаскаваная пад фільм жахаў
Адзнака: 4 (з 10)
Сіэтл ахоплены масавымі забойствамі. Помслівая вампірка збірае армію, каб пакараць дзяўчынку Бэлу і ейнага сябра Эдварда Калена. А гераіня ў цяжкім роздуме: хто падабаецца ёй болей — арыстакратычны вампір Эдвард ці мускулісты ваўкалак Джэйкаб?
Трэцяя частка «Прыцемак» — чарговы накротык для рамантычных дзяўчынак.Папулярнасць сагі абавязаная жанру мыльнай оперы. З мыльнай оперы — уздыхі, слёзы і доўгія развагі пра тое хто каго любіць. Што ён сказаў? А што яна падумала? А што ён сказаў на тое, што яна падумала?
Містычныя героі з пяшчотай чытаюць дзявочыя думкі, адгадываюць усе ейныя сненні. Ударная сцэна: напаўаголены Джэйкаб сагравае гераіню сваім целам, а арыстакрат Эдвард распавядае, што не можа без гераіні жыць.
Усе закалоты, гутаркі, войны — вакол дзяўчынкі й ейных пачуццяў.
Але сакрэт сагі ў тым, што гераіня — пустое месца, залюлянае цёмнымі сіламі.Выдатная нагода глядачкам заняць вакансію.
