02.07.2010 / 13:58

Завод разварушыў народ

Жыхары вёскі Шырокая на Лідчыне, якія змагаюцца супраць будаўніцтва шкоднага хімічнага прадпрыемства ля сваіх дамоў, не пусцілі на парог раённага ідэолага.

Жыхары вёскі Шырокая на Лідчыне, якія змагаюцца супраць будаўніцтва шкоднага хімічнага прадпрыемства ля сваіх дамоў, не пусцілі на парог раённага ідэолага.

Людзі пратэстуюць супраць планаў паставіць за іх гародамі завод гарачага цынкавання металаканструкцый. Ім нарэшце пачалі прыходзіць адказы з розных інстанцый.

Лідскі занальны цэнтр гігіены і эпідэміялогіі адказаў, што да 2011 года будуць праведзены папярэднія працы па распрацоўцы санітарна‑абарончай зоны і меркаванні насельніцтва пра будаўніцтва прадпрыемства ўлічаць.

З Мінпрыроды прыйшоў адказ, што будзе праведзены аналіз месца для альтэрнатыўнага размяшчэння прадпрыемства. Пішуць і пра магчымасць правядзення грамадскіх слуханняў.

«Не верыцца, што яны прышлюць нам незалежных экспертаў, — кажа Валянціна, жыхарка Шырокай. ‑‑ Зноў папрыязджаюць «акадэмікі», раскажуць, як усё бяспечна».

Людзі працягваюць збіраць подпісы супраць будаўніцтва завода, які плануюць пабудаваць за 300 метрах ад вёскі Шырокая і за 800 метраў ад Ліды. На сёння ужо сабрана 2800 подпісаў ад жыхароў вёсак Гарні, Шырокая, Даліна, Астроўля і самой Ліды. Людзі падпісваюцца ахвотна. З пяцідзесяці адмаўляецца адзін‑два чалавекі, часцей старыя, якія баяцца выступаць супраць улады.

Найбольшая праблема ў тым, што большасць лідчукоў папросту не чула ні пра завод, ні пра гарачае ацынкаванне металу.

Адзіным грамадскім рухам, які павёў сябе палітычна ў дачыненні да лідскай праблемы, стала ініцыятыва «Гавары праўду». Яе актывісты збіраюць подпісы з патрабаваннем грамадскіх слуханняў з удзелам усіх зацікаўленых асобаў. Таксама 539 подпісаў ад жыхароўЛідчыны было перададзена Сяргею Сідорскаму і Міхаілу Мясніковічу з просьбай даць гарантыі, што прадпрыемства не будзе прадукаваць шкодных выкідаў у атмасферу і ваду. Яшчэ адзін ліст з подпісамі рыхтуюць да мясцовага дэпутата. Яго ж абавязак ‑‑ бараніць інтарэсы жыхароў.

Жыхары Гарнёў і Шырокай шчыра радуюцца, што іх гісторыя зацікавіла людзей і да іх завіталі журналісты з незалежных выданняў і лідэр «Гавары праўду» Уладзімір Някляеў. Акрамя журналістаў і «праўдалюбцаў» завітвала і супрацоўніца ідэалагічнага аддзела райвыканкама. Праўда, па першым прыездзе людзі нават не пусцілі яе на парог. Так завод гарачага ацынкавання металу разварушыў некалькі вёсак.

Настасся Шамрэй

Каб пакінуць каментар, калі ласка, актывуйце JavaScript у наладах свайго браўзеру