21.07.2010 / 12:15

Выбары пад пугай Масквы 12

Лукашэнка склікае пазачарговую сесію Палаты. Піша ў сваім блогу на НН Аляксандр Класкоўскі.

Лукашэнка склікае пазачарговую сесію Палаты 7 верасня. Адпаведны ўказ быў падпісаны без шуму і пылу яшчэ 19 ліпеня. З вялікай імавернасцю можна прагназаваць, што на той сесіі прызначаць дату выбараў.

Фармальна сесію склікаюць дзеля таго, каб загадзя разгледзець праект бюджэту на новы год. Матывацыя не вытрымлівае крытыкі: які бюджэт у верасні, калі цэны на газ ды нафту віламі па вадзе пісаныя? У былыя гады гэты бюджэт пастфактум перараблялі шматкроць з лёгкасцю неймавернай.

Не пра тое баліць галава ў высокага начальства.

Усё болей чыннікаў падштурхоўваюць правесці выбары раней, чым стрэліць навагодняе шампанскае. Інфармацыйная вайна толькі раскручваецца, і тут пачынае ўжо дзейнічаць закон эскалацыі канфліктагенаў. У любы момант можа выбухнуць разборкамі крыва злеплены Мытны звяз. Чым далей, тым большая імавернасць, што Масква стрэліць сваім кандыдатам, тэрмаядзерным кампраматам, шалёным цэннікам на энерганосьбіты і г.д.

Паводле Выбарчага кодэкса, кампанія доўжыцца каля трох месяцаў. Таму, зірнуўшы ў каляндар, можна вызначыць імаверную дату выбараў — нядзеля, 12 снежня.

Хутчэй, хутчэй, пакуль Масква не пачала сцябаць пугай па поўнай праграме!

Перадвыбарчая кампанія дэ-факта пачалася. «Імправізаваная» прэс-канферэнцыя Лукашэнкі 16 ліпеня на Гомельшчыне — гэта ўжо канкрэтны пункт піяр-кампаніі. Яна, відавочна, будзе грунтавацца ў значнай ступені на незалежніцкай ды антыкрамлёўскай рыторыцы.

Тым часам са жніўня на 12,5% павышаюцца пенсіі. Будуць за вушы цягнуць угору і заробкі. Пачынаецца напампоўванне эканомікі пустой грашовай масай. Пасля выбараў, прагназуюць эканамісты, гэта выльецца ў інфляцыю, дэвальвацыю і г.д. Масква непазбежна павысіць цэны на газ. Невядома што будзе з нафтай. Настане час сплочваць вялікія грошы па замежных пазыках.

Карацей,

чарговая пралангацыя паўнамоцтваў вядомымі спосабамі не вырашае для Лукашэнкі ніводнай праблемы. Наадварот, яны канцэнтруюцца ў грымучую сумесь.

P. S.Казаць, што наверсе вызначыліся з датай выбараў на 100%, я б усё ж не спяшаўся. Лукашэнка, магчыма, яшчэ вагаецца. Чаму — асобная тэма.

Аляксандр Класкоўскі

0
Варган / Адказаць
21.07.2010 / 13:24
Лукашэнка любіць канфлікты. Калі іх менее - стварае сам. Дарма думаць, што ён сядзіць у грымучай зьмесі. Ну пасядзеў некалькі дзён у прастрацыі пасьля кінапаказу, ачухаўся. Цяпер з зухаватай праставатасьцю джагне, сьлязу пусьціць дзе трэба. Атрымаецца элегантна.
0
sid / Адказаць
21.07.2010 / 14:07
сп. Класкоўскі, Масква і Лукашэнка перад выбарамі памірацца, колькі разоў ужо можна паўтараць адно і тое ж. Крэмль выдатна разумее, што лягчэй дамовіцца нават з Рыгорычам, чым яго скідваць. У крайнім выпадку Расея будзе трымаць нейтралітэт і прызнае элегантную перамогу. Потым абвясцяць аб "перагрзуцы" расейска-беларускіх адносін. Ніякага сур'езнага прарасейскага кандыдата не будзе. Ну толькі калі самаго афіцыйнага лідара не лічыць гэткім.
0
Scooter / Адказаць
21.07.2010 / 14:33
"Чым далей, тым большая імавернасць, што Масква стрэліць сваім кандыдатам, тэрмаядзерным кампраматам, шалёным цэннікам на энерганосьбіты і г.д." -- хацелася б больш канкрэтыкі, хто гэты кандыдат і які такі "тэрмаядзерны кампрамат"? А цэньнік на газ яны ўжо даўно і так агучылі: 250$ за 1000 кубоў. "чарговая пралангацыя паўнамоцтваў вядомымі спосабамі не вырашае для Лукашэнкі ніводнай праблемы" -- я б сказаў, што як мінімум яна "вырашае" праблему самой пралангацыі. Відавочна, што гэта праблема будзе вырашацца ні на ўчастках, а на плошчах і вуліцах. Дык вось зімой, асабліва перад НГ варыянт "плошчы" нашмат менш верагодны, чым пасьля НГ. Так што ў нейкім сэньсе сама па сабе праблема пралагнацыі можа быць ні такой ужо і праблемай.
Паказаць усе каментары/ 12 /
Каб пакінуць каментар, калі ласка, актывуйце JavaScript у наладах свайго браўзеру