29.07.2010 / 13:39

Міліцэйская чыстка на Гомельшчыне 12

Больш за 30 супрацоўнікаў і кіраўнікоў сістэмы МУС прыцягнутыя да адказнасці пасля трагедыі ў Рагачоўскім раёне

Пасля забойства міліцыянерам дзяўчыны ў Рагачоўскім раёне больш за трыццаць супрацоўнікаў і кіраўнікоў сістэмы МУС прыцягнуты да дысцыплінарнай адказнасці — ад вымоў да звальнення. Пра гэта БелаПАН паведаміў Юрый Дзям'янчык — начальнік следчага аддзела па найважнейшых справах пракуратуры Гомельскай вобласці, які займаецца расследаваннем крымінальнай справы ў дачыненні да ўчастковага міліцыянера.

Паводле слоў Дзям'янчыка, службовая праверка, праведзеная ўпраўленнем уласнай бяспекі МУС, паказала, што прычыны ўчынення злачынства — не толькі асабістыя нізкія маральныя якасці міліцыянера, але і практычна поўная адсутнасць кантролю з боку кіраўніцтва Рагачоўскага РАУС і Гомельскага УУС. Індывідуальна-выхаваўчая работы ў РАУС, адзначыў ён, праводзілася фармальна.

На момант правядзення праверкі ў Рагачоўскім РАУС адзін супрацоўнік міліцыі быў у стане алкагольнага ап'янення — потым ён быў звольнены, другі — некалькі гадзін адсутнічаў на працоўным месцы без паважлівай прычыны, яго панізілі на пасадзе.

За грубае парушэнне дысцыпліны з шэрагаў міліцыі звольнены абвінавачваны ва ўчыненні замаху на забойства дзяўчыны 30-гадовы ўчастковы, які працаваў у органах з 1996 года, і трое яго калег, якія знаходзіліся на месцы ўчынення злачынства. Адзін з прысутных на месцы НЗ міліцыянер знік, але праз два дні яго месцазнаходжанне было ўстаноўленае.

Яшчэ трое супрацоўнікаў Рагачоўскага РАУС, адказныя за ахову грамадскага парадку, прыцягнуты да дысцыплінарнай адказнасці. Два супрацоўнікі РАУС атрымалі строгую вымову, адзін — вымову, яшчэ адзін — паніжаны на пасадзе.

Начальнікі штаба РАУС і экспертна-крыміналістычнай службы атрымалі па строгай вымове. Сем кіруючых работнікаў РАУС — намеснікі начальніка і начальнікі структурных падраздзяленняў — па строгай вымове за неналежнае выкананне службовых абавязкаў. Начальнік РАУС паніжаны на пасадзе.

Строгія вымовы таксама вынесены сямі кіраўнікам упраўленняў УУС Гомельскага аблвыканкама, аб'яўлена вымова і начальніку УУС.

Пакараны вымовай тры кіраўнікі ўпраўленняў МУС, адказныя за ахову грамадскага парадку, прафілактыку, кадры і следства

Нагадаем, трагедыя адбылася позна ўвечары 6 ліпеня. Участковы міліцыянер Рагачоўскага РАУС, знаходзячыся ў службовай машыне, выстраліў з табельнага пісталета ў 22-гадовую дзяўчыну, жыхарку вёскі Журавічы Рагачоўскага раёна. Яна атрымала сляпое агнястрэльнае раненне галавы і памерла праз 10 дзён у бальніцы, не прыходзячы ў прытомнасць.

Устаноўлена, што міліцыянер на момант учынення злачынства быў п'яны — у яго крыві было каля 1,8 праміле алкаголю.

У крыві яго калегі-участковага, які таксама знаходзіўся на месцы НЗ, было 2,0 праміле алкаголю. Трэці ўдзельнік кампаніі міліцыянераў збег, таму яго не агледзелі. Вадзіцель-міліцыянер быў цвярозы, але ён не праінфармаваў кіраўніцтва аб тым, што яго калегі п'янствуюць, а не ахоўваюць грамадскі парадак.

Гомельская абласная пракуратура распачала справу па ч. 1 арт. 14, 139 Крымінальнага кодэкса (замах на забойства). Не выключана, што канчатковае абвінавачанне будзе прад'яўлена як забойства.

0
скептык / Адказаць
29.07.2010 / 14:31
і вы такі думаеце, што нешта зьменіцца?
0
Scooter / Адказаць
29.07.2010 / 16:26
2скептык, ну як мінімум, пакажуць мясцовым "князькам", што і за імі сочаць, усё лепш, чым нічога ні рабіць. А глабальна нешта можа памяняцца толькі калі ўвесьці нармальную мяжу з Расеяй, бо негатыўны ўплыў яе на усходнія вобласьці Беларусі каласальны.
0
Sarcasm / Адказаць
29.07.2010 / 16:45
Загаловак гарыць як фаервэрк - "чыстка!", а вось з тэксту мы даведваемся, што звольнены 1 (адзін) супрацоўнік. Усім чысткам чыстка.
Паказаць усе каментары/ 12 /
Каб пакінуць каментар, калі ласка, актывуйце JavaScript у наладах свайго браўзеру