Радасць датчан.
Беларускаму чэмпіёну на бліжэйшы год трэба развітацца з марамі пра групавы этап Лігі чэмпіёнаў. У сераду каманда Віктара Ганчарэнкі прайграла «Капенгагену».
Першая гульня каманд тыдзень таму ў Барысаве прынесла нічыйны вынік — 0:0. Прычым, з абодвух бакоў гульня атрымалася закрытай.
Затое ў сталіцы Даніі атрымаўся шчыры футбол. Можа віной таму стаўся выпадак ужо на 62‑ой секундзе гульні, калі бразілец Сезар Санцін скарыстаўся з таго, што беларусы няўдала рабілі штучны афсайд. Санцін накіраваў мяч міма спалоханага Верамко — 1:0.
І тут «Капенгаген» прапанаваў БАТЭ гуляць першым нумар, але нічога талковага ў атаках не атрымлівалася. Хіба што Радзівонаў аднойчы ў штрафной не трапіў па мячу.
БАТЭ так уцягнулася ў атаку, што часам забывала пра абарону. І на 27‑ай хвіліне Уільям Квіст (ён быў у заяўцы Даніі на чэмпіянаце свету) далёкім ударам падвойвае лік. Верамко, здаецца, у гэтым моманце мог згуляць і лепш.
Толькі пасля такіх надзвычайных падзей БАТЭ нарэшце троху загуляў. Зрэшты, гол Канцавога на 40‑ой хвіліне нарадзіўся з нічога. Ніякіх прадпасылак гэтаму не было. А яшчэ, здаецца, у паўабаронцы быў афсайд.
А ўжо праз чатыры хвіліны індывідуальнае майстэрства прадэманстраваў Павел Няхайчык. Абыграўшы на замаху абаронцу, ён паклаў мяч нібы ў більярдную лузу — 2:2.
Цяпер ужо «Капенгагену» трэба было забіваць, бо нічыя на карысць беларусаў.
А ў самым пачатку тайма другога Радзівонаў мог вывесці нашых наперад, але трапіў у папярэчыну. Датчане прыбралі ініцыятыву да сябе. І гола не давялося доўга чакаць.
Таранны сенегалец Н’дае праціснуўся ў штрафную, адштурхнуў Юрэвіча і з наска паслаў мяч у браму — 3:2.
Беларусы пайшлі ў атаку, але зрабіць чарговы подзвіг так і не змаглі. Замены таксама зрабіць гульню больш моцнай не змаглі. Што казаць, калі на замену былі вымушаныя выпусціць неабстралянага Дзмітрыя Багу, бо больш няма каго.
«Капенгаген» упусціў яшчэ некалькі вернякоў, Сасноўскі дагуляўся да выдалення. Датчане прайшлі далей, яны ўжо забяспечылі сабе футбольную восень.
Ну а БАТЭ застаецца чакаць пятніцы, дзе каманда даведаецца суперніка па плэй‑оф Лігі Еўропы.
