Ад сёньня сытуацыя з будынкам пратэстанцкай царквы «Новае жыцьцё» набывае якасна новы характар. 9 кастрычніка сыходзіць тэрмін, калі паводле закону будынак пераходзіць да дзяржавы (дзесяць дзён таму на рахунак царквы было пералічана 17 тыс. даляраў).

Аднак вернікі царквы, а таксама прадстаўнікі іншых пратэстанцкіх саюзаў, што далучыліся да іх на знак салідарнасьці, працягваюць акцыю пратэсту. Ад 6 кастрычніка ў будынку царквы працягваецца пост-галадоўка. Пастар царквы «Новае жыцьцё» Вячаслаў Ганчарэнка кажа пра істотную падтрымку з боку пратэстанцкіх цэркваў Беларусі: «На ўчорашнім богаслужэньні прысутнічала 25 пастыраў, што маюць вялікі ўплыў у сваіх суполках». Таксама, як ён кажа, чакаюцца акцыі салідарнасьці за мяжою – пікеты каля беларускіх пасольстваў. А ўжо цяпер з-за мяжы тэлефануюць і пішуць неабыякавыя людзі, выказваюць падтрымку галадоўнікам.

Пастар Ганчарэнка ня ведае, чаго чакаць ад уладаў ад сёньняшняга дня, але выказвае ўпэўненасьць у дзеяньнях пратэстуючых: «Мы ўжо неаднаразова выказваліся на гэтую тэму і магу яшчэ раз сказаць – добраахвотна сваю царкву мы не аддамо». На пытаньне пра настрой людзей, што на дадзены момант знаходзяцца ў царкве, ён кажа, што зараз ідзе абмеркаваньне наконт аптымізацыі ўмоваў галадоўкі. «Людзі настроеныя рашуча і ўпэўнена», – кажа В.Ганчарэнка.

Сустаршыня аргкамітэту Беларускай хрысьціянскай дэмакратыі Аляксей Шэін таксама далучыўся да галадоўкі. Паводле ягоных словаў, на дадзены момант ў акцыі пратэсту ўдзельнічае каля 110 чалавек. Частка трымае галадоўку ў самім будынку царквы (цяпер там знаходзіцца блізка паўсотні чалавек), частка – па-за яе межамі. Аляксей разам зь сямюдзесяцьцю вернікамі знаходзіўся ў царкве сёньня ўначы. Ён кажа, што акцыя пратэсту вернікаў царквы «Новае жыцьцё» не засталася па-за ўвагай прадстаўнікоў іншых цэркваў: «Учора на службе былі прадстаўнікі Саюзу цэркваў веры эвангельскай, з Баранавічаў вернікі пяцідзясятніцкіх цэркваў «Збаўленьне» і «Новае жыцьцё» (ня блытаць зь менскай царквой)».

На думку сп.Шэіна, сытуацыя з будынкам царквы мае некалькі варыянтаў разьвязаньня. Першае, сілавое вырашэньне з прыцягненьнем да высяленьня міліцыі. Другое, што падаецца больш вераемным, зацягваньне вырашэньня праблемы. «На носе зіма, і, магчыма, улады спадзяюцца, што людзі стомяцца пратэставаць, увага да акцыі пратэсту ападзе, – мяркуе А.Шэін. – Аднак другі варыянт таксама ненадзейны, калі ўлічыць, наколькі неадэкватныя бываюць учынкі ўладаў. Таму мы мусім быць гатовыя да ўсяго».

На гэтую ж тэму глядзі:

Іван Пашкевіч: Вучань Лукашэнка годны свайго настаўніка Сталіна. (Былы намесьнік кіраўніка Адміністрацыі прэзыдэнта, а цяпер дарадца старшыні Саюзу эвангельскіх хрысьціян-баптыстаў камэнтуе галадоўку эвангелістаў з царквы «Новае жыцьцё»);

– а таксама блогі Юліі Дарашкевіч і Андрэя Лянкевіча.

Хочаш падзяліцца важнай інфармацыяй ананімна і канфідэнцыйна?