28.08.2010 / 14:55

У Мінску падскочыла цана на грэчку, у рэгіёнах пакуль не 5

Расію накрыла харчовая паніка — у буйных гарадах з прылаўкаў крамаў знікла грэчка. Перад гэтым яна падаражала ў некалькі разоў. Масквічы і піцерцы прыгадалі часы дэфіцыту ды стаяння ў чэргах. Афіцыйныя асобы адрапартавалі, што так званы «дэфіцыт грэчкі» справакавалі СМІ, якія спекулююць на тэме сушы і неўраджаю. Дасталася і дробнааптовым прадаўцам, якія абяцаюць рост цэнаў і са з’яўленнем ураджаю грэчкі гэтага году. Прадстаўнікі Расійскага зерневага саюза супакоілі, што ўраджай грэчкі сёлета будзе дастатковым для задавальнення патрэбаў унутранага рынку.

Міністэрства эканамічнага развіцця РФ заявіла: дэфіцыт і падаражанне грэчкі — часовая з’ява, звязаная са скарачэннем леташніх запасаў і чаканнем новага ўраджаю.

Рэха «грэцкай панікі» дакацілася і да Беларусі. Што праўда, закранула яно пакуль толькі сталіцу: апытанне чытачоў «НН» з розных куткоў Беларусі паказала, што пра «грэчневую паніку» ў лепшым выпадку чулі па тэлевізары.

Паход па крамах у Мінску даў наступную карціну. У невялікіх крамках грэчкі або няма, або засталося няшмат. Цэны вагаюцца ад 2500 рублёў да 3800, а то і больш. «Бярыце, пакуль не падаражала!» — смяюцца прадаўцы.

Павевы панікі адчуваюцца на Камароўскім рынку. Амаль ва ўсіх прадаўцоў грэчка расійскага паходжання з выявай генералісімуса Суворава каштуе ад 4100 рублёў. «Падаражала ўся — і нашая, і расійская», — кажа прадавачка. Яе суседка дадае: «І будзе яшчэ цана расці. На наступным тыдні мяняем цэннікі. Дарасце да 6 тысяч, а мо і болей».
Аднак купцоў гэта мала хвалюе. «А хоць да 10 тысяч! Я яе мала купляю», — адрэагавала на перасцярогі прдаўцоў жанчына. Пры жаданні, на Камароўцы аматару грэчкі можна яшчэ знайсці танныя крупы. Напрыклад, беларускую грэчку па 1650 рублёў за 750-грамовы пакунак.

Дырэктар ААТ «Гомельскі камбінат хлебапрадуктаў» Міхаіл Белашыцкі параіў не спяшацца з высновамі наконт магчымага ажыятажу вакол грэчкі ў Беларусі. «Ураджай яшчэ не сабралі, таму гаварыць пра нешта можна будзе праз тыдзень», — кажа спадар Белашыцкі (па стане на 28 жніўня было ўбрана каля 23% плошчаў — «НН»). Ён адзначыў таксама, што закупныя цэны на грэчку засталіся ранейшымі, а прагнозы на ўраджай грэчкі ў Беларусі сёлета неблагія.

Сямён Печанко

0
Міхась / Адказаць
28.08.2010 / 17:34
4 месяцы таму грэчка ў нас каштавала 1 200 - 1500 руб за 900 г. Здаецца менавіта такі быў кошт і ўкраінскай, і расейскай.
0
wint / Адказаць
28.08.2010 / 21:31
Вяртаўся ўчора на машыне з Крыму. Па дарозе слухаў іхныя фм-станцыі. У навінах іхных казалі, што кіля грэчкі ў іх крамах падрасла да 18-23 грывень за кілё - гэта недзе 8-9 тыс. на нашыя. Мы ўчора з жонкай шчэ вельмі зьдзівіліся, колькі тады ў нас яна будзе каштаваць. Але да крам пакуль не дайшлі. Лянотна пасьля адпачынку. :) А каштавала яна ў нас здаецца каля 2500 апошнім часам.
0
mikola ramanau / Адказаць
28.08.2010 / 21:41
nesta bacu sto za 10 kilo pryslos zaplacic kalia 10 eura...a razvar'vaeca lepei za belgiiskuiu...
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру