Супрацоўнікі дэпатрамэнту ў барацьбе з арганізаванай злачыннасьцю ды тэрарызмам МУС Расеі затрымалі трох удзельнікаў найбуйнейшага беларускага злачыннага фармаваньня «Пажарнікі», у тым жа ліку іхняга лідэра – 35-гадовага Генадзя Бярэзіна.

Як паведамляе прэсавая служба дэпартамэнту, затрыманьне рабілі з дапамогай беларускіх калег у кватэры на Кутузаўскім праспэкце. Акрамя Бярэзіна схапілі Алега Чыркова і Вячаслава Ліцэнштэйна. У іх канфіскавалі фальшывыя пашпарты грамадзян Расеі і Беларусі.

Паводле інфармацыі МУС, усе затрыманыя былі ў міждзяржаўным вышуку за ўчыненьне цяжкіх злачынстваў. Цяпер правяраюць, ці яны мелі дачыненьне да злачынстваў на тэрыторыі Расеі, і вырашаюць пытаньне пра іхнюю экстрадыцыю ў Беларусь.

Арганізаванае злачыннае фармаваньне (АЗФ) «Пажарнікі» паўстала на тэрыторыі Гомельскай вобласьці ў 1990-х гадох. Бандыты спэцыялізаваліся на вымаганьнях, разбойствах, крадзяжох, «крышаваньні» прастытуцыі ды незаконным аўтабізнэсе.

У красавіку-чэрвені на тэрыторыі Маскоўскага рэгіёну затрымалі шасьцёх удзельнікаў АЗФ, што былі ў вышуку. У жніўні 2006 г. суд на Гомельскую вобласьць прызнаў 27 чальцоў банды вінаватымі ў больш як 100 злачынствах (у тым ліку блізка 80 цяжкіх і асабліва цяжкіх) і прысудзіў да вастрогу ад 3 да 14 год. 11 бандзюкоў здалелі схавацца. Большасьць зь іх перабралася ў Расею.

Хочаш падзяліцца важнай інфармацыяй ананімна і канфідэнцыйна?