Доказ (Proof).
ЗША, 2004, каляровы, 100 хв.
Жанр: драма паводле п’есы Дэвіда Обэрна.
Адзнака: 5 (з 10).
Па сьмерці бацькі, геніяльнага матэматыка-вар’ята (Энтані Хопкінз), Кэтрын (Гвінэт Пэлтраў) баіцца таксама звар’яцець. Гераіня сумняецца ў сваім розуме, і яе каханьне да маладога чалавека праходзіць выпрабаваньне.
Як і карціна «Гульні розуму», «Доказ» распавядае пра матэматыку й трызьненьне — і складаную прастату чалавечага жыцьця. Але фільм Джона Мэдэна («Закаханы Шэксьпір») статычны й тэатральны.
Замест параноі «Гульняў» — засяроджанасьць і гістэрыка, замест шызоідных ворагаў — клапатлівы прывід бацькі. І кіно набывае рысы мэлядрамы. Толькі мэлядрама гэтая рацыянальна-халодная, як апошнія пробліскі розуму, дзе доказ каханьня шукаецца ў формулах.
Любоў немагчыма даказаць алгебрай.