Сёння Лукашэнка дасць прэс-канферэнцыю для расійскіх журналістаў

Як паведаміў кіраўнік прэс-службы прэзідэнта Павел Лёгкі,

больш за 100 расійскіх журналістаў прыбылі ў Беларусь 28 верасня ў межах чарговага, восьмага па ліку, прэс-тура.

«Яны прадстаўляюць выданні прыблізна 60 расійскіх рэгіёнаў, частка з іх прадстаўляе федэральныя расійскія СМІ, яшчэ частка — СМІ Саюзнай дзяржавы Беларусі і Расіі», — сказаў Лёгкі.

Ён адзначыў, што гэта самы масавы «дэсант» расійскіх журналістаў у Беларусь. «За восем гадоў гісторыі прэс-тураў расійскіх журналістаў у нашу краіну такой колькасці расійскіх прадстаўнікоў СМІ ў нас не было. Было па 70–80 чалавек, але не 100. Гэта сведчыць пра вялікую ўвагу расійскіх выданняў да нашай краіны», — сказаў Лёгкі.

Паводле звестак афіцыйных СМІ,

прамую трансляцыю прэс-канферэнцыі будзе весці Першы канал Беларускага радыё. Тэлеверсію пакажуць сёння вечарам усе нацыянальныя тэлеканалы.

Напярэдадні расійскае Агенцтва палітычных навін са спасылкай на крыніцу ў крамлёўскай адміністрацыі паведаміла, што Крэмль настойліва рэкамендаваў федэральным СМІ ўстрымацца ад удзелу у «рэкламных турах» па Беларусі.

Папярэдні прэс-тур з удзелам 76 расійскіх журналістаў праводзіўся з 29 верасня па 2 кастрычніка 2009 года і таксама завяршыўся сустрэчай з беларускім прэзідэнтам.

БелаПАН

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм