20.10.2006 / 10:07

Мілінкевіч зьехаў, а Пуцін сыходзіць 2

Гаспадар Крамля наеўся ўлады. У Беларусі яе ўсім мала.

Апошнім часам былому адзінаму кандыдату даюць дыхту з усіх бакоў. Вось і незалежныя сацыёлягі ўлілі лыжку дзёгцю. Паведамілі, што за паўгода ягоны рэйтынг зьехаў напалову: з 20,4% да 11,6%. На сёньня паказчык, мабыць, яшчэ болей сьціплы.

Зрэшты, зьдзіўляе ня гэта. Расчараваньне наіўных шараговых дэмакратаў зразумелае. Цяжка зразумець іншае: працяг заклінаньняў пра непазьбежнасьць хуткай мірнай рэвалюцыі. Падаецца, усё ж бліжэйшы да ісьціны палітоляг Аляксандар Рар, сьцвярджаючы: сцэнар каляровых рэвалюцыяў, "што яшчэ год-два таму разглядаўся Эўропай як нейкі шанец дзеля дэмакратызацыі краінаў былога СССР, зараз сябе ўжо вычарпаў".

Асэнсаваньня ж той новай рэальнасьці, у якой апынуліся апанэнты ўлады пасьля сакавіка, у іхнім асяродзьдзі амаль што няма. Затое Мілінкевічу даюць высьпяткаў зь нейкай садысцкай апантанасьцю. Галоўны рэдактар "Беларускіх навінаў" Кірыла Пазьняк задаецца рытарычным пытаньнем: нашто ў апазыцыйным лягэры так скубуцца за саколку лідэра? Бо сапраўды: каму ні дай, да выбараў 2011 году зашмальцуюць дарэшты...

А вось Пуцін, на думку маскоўскага публіцыста Леаніда Радзіхоўскага, апошнім часам клопат пра выбары выкінуў з галавы. "Адвязаўся" настолькі, што дазволіў сабе нават фрывольна павіншаваць ізраільскага калегу са згвалтаваньнем дзесяці кабетаў.

Паводле вэрсіі Радзіхоўскага, гаспадар Крамля разьняволіўся з тае прычыны, што цьвёрда вырашыў для сябе: сыходжу!

Беларускія назіральнікі падстаў для аналягічнай вэрсіі пакуль што ня могуць разгледзець і ў мікраскоп. Ва ўсякім разе, віншаваньні замежным калегам з рэзыдэнцыі на Карла Маркса, 38 ідуць выключна пратакольныя. Ды і ўвогуле там жартаваць ня любяць.

Аляксандар КЛАСКОЎСКІ

Хочаш падзяліцца важнай інфармацыяй ананімна і канфідэнцыйна?

0
Гы! / Адказаць
20.10.2006 / 10:32
Што там дзесяць кабетаў! Бывае. што гвалтуюць цэлую краіну!
0
Vital / Адказаць
21.10.2006 / 00:04
sapraudy, nekatoryja moza i pradsmakouvali nejkija zmeny, ale tolki u marah. ja, napriklad, zausedy liciy sto na Bjalarusi scenar Ukrainy nemagcymy, prosta tamu cto my roznyja. dlia nas samym padyhodziacym zjaulaecca na moj pogliad scenar Salidarnasci.
Каб пакінуць каментар, калі ласка, актывуйце JavaScript у наладах свайго браўзеру