Вікторыя Азаранка выйшла ў фінал Кубка Крамля

AFP.

Беларуская тэнісістка Вікторыя Азаранка (2-гі пасеў на турніры) выйшла ў фінал турніра Кубак Крамля, прызавы фонд якога складае 1 млн даляраў. У паўфінальным паядынку ў суботу 23 кастрычніка яна выйграла ў іспанкі Марыі Марцінэс-Санчэс з лікам 6:3, 6:3.

Лёс першай партыі вырашыў адзіны брэйк, зроблены Вікторыяй Азаранка ў пятым гейме. У другім сэце ў Марцінэс-Санчэс і зусім не было ніводнага шанцу зламаць падачу суперніцы. Азаранка жа зрабіла два брэйкі — адзін у самым пачатку партыі, а другі — у дзевятым гейме, сталым апошнім у гэтым паядынку.

У фінале Азаранка сустрэнецца з Марыяй Кірыленка, якая сёння разграміла Веру Душэвіну (абедзве - Расія) - 6:1, 6:1.

Алег Гардзіенка

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм