Індывідуальны прадпрымальнік з Віцебска Уладзімір Правальскі мае намер аспрэчваць вынікі праверкі тэрытарыяльнымі выбарчымі камісіямі подпісаў, сабраных у падтрымку яго вылучэння кандыдатам у прэзідэнты.
«Пакуль абскарджваць няма чаго. Буду чакаць рашэнне Цэнтрвыбаркама і тады падаваць скаргу ў суд», — сказаў прэтэндэнт у прэзідэнты.
Ён нагадаў, што раней праз СМІ ўжо абвяргаў словы старшыні Цэнтрвыбаркама Лідзіі Ярмошынай пра тое, што ў яго падтрымку сабрана толькі 700 подпісаў. «Я заяўляў, што гэта хлусня. Не разумею, як такая высокапастаўленая асоба магла такое заявіць. Лічу, пракуратура павінна правесці адпаведную праверку», — сказаў Правальскі.
Як раней паведамляў ЦВК, у тэрытарыяльныя выбарчыя камісіі ў падтрымку Правальскага было здадзена 109 тыс. 338 подпісаў. Аднак 5 лістапада Ярмошына заявіла журналістам, што толькі 700 подпісаў з’яўляюцца рэальнымі, астатнія — ксеракопіі.
8 лістапада ў Першамайскай раённай выбарчай камісіі Віцебска БелаПАН паведамілі: вынікі праверкі, у тым ліку з прыцягненнем органаў унутраных спраў, пацвердзілі несапраўднасць большасці подпісаў, здадзеных у падтрымку Правальскага.
