Вакол цела на полі – правільна накрэслены круг

Цела 72-гадовага пенсіянера 4 лістапада знайшоў вайсковец ля вёскі Камень Валожынскага раёна. Цела 66-гадовай пенсіянеркі 6 лістапада знайшоў прахожы ў будынку закінутай фермы ў Турэц-Баярах Маладзечанскага раёна.

У абодвух выпадках папярэдняя прычына смерцяў — агульнае пераахаладжэнне.

Намеснік пракурора Валожынскага раёна Віталь Юрэвіч расказаў, што пенсіянер, жыхар вёскі Камень Івянецкага сельсавета, знік дзесьці за тыдзень да таго, як знайшлі яго цела. Мужчына быў аб’яўлены ў вышук.

4 лістапада вайскоўцы ў пошуках зніклага прачэсвалі поле, засеянае азімымі, на адлегласці прыкладна за кіламетр ад Каменя. Цела за 150 метраў ад лесу знайшоў адзін са службоўцаў. Аказалася, ён ведае гэтага мужчыну, бо жыў у вёсцы з ім на адной вуліцы.

Памерлы ляжаў на жываце. На нагах не было шкарпэтак, калошы штаноў закасаныя амаль да калена.

Вакол цела на полі — правільна начэрчаны круг. Па словах Віталя Юрэвіча, медсудэксперты звязваюць гэта з тым, што калі чалавек пачынае замярзаць, ён перад смерцю можа выконваць нейкія неадэкватныя дзеянні. Напрыклад, распранацца. Экспертыза ўстанаўлівае таксама, ці выпіваў пенсіянер перад смерцю спіртное.

Мужчына, які знайшоў у закінутай ферме ў Турэц-Баярах цела пенсіянеркі, паведаміў пра гэта ў міліцыю. Бачных цялесных пашкоджанняў на целе памерлай не было.

Медыцынскі судовы эксперт выказаў меркаванне, што жанчына магла памерці ў ноч з пятніцы на суботу. Жанчына жыла адна ў Турэц-Баярах. Яе дачка знаходзіцца ў месцах пазбаўлення свабоды. Ці была пенсіянерка на момант смерці ў стане алкагольнага ап’янення, высвятляе экспертыза.

Сяргей Зянько, Рэгіянальная газета

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ