Някляеў і Саннікаў дамовіліся 49

Але здымацца на чыюсьці карысць ніхто не будзе.

Апазіцыйныя кандыдаты на пасаду прэзідэнта Уладзімір Някляеў і Андрэй Саннікаў дамовіліся аб каардынацыі дзеянняў на час выбарчай кампаніі.

Лідар кампаніі «Гавары праўду» згадаў нядаўнюю прэс-канферэнцыю, у якой, апроч яго, удзельнічалі Віталь Рымашэўскі, Мікалай Статкевіч і Анатоль Лябедзька. «Тады мы ні да чаго не дамовіліся і ніхто нічога не вынес», — кажа кандыдат.

Андрэй Саннікаў зазначыў, што кандыдаты маюць намер весці супольную агітацыйную і інфармацыйную працу, сумесную міжнародную працу. Гэта дасць свае плады».

А.Саннікаў гаварыў збольшага па-расійску, а У.Някляеў па-беларуску.

У.Някляеў кажа, што паводле ўсіх вынікаў сацыялагічных апытанняў ёсць два відавочныя лідары — ён сам і Андрэй Саннікаў.

«Мы не разглядаем магчымасці зняцца, — зазначыў А.Саннікаў. — На Плошчы будзем адстойваць выбар народу».

Не абышлося ад пытанняў адносна таго, што абодвух кандыдатаў лічаць прарасійскімі.

«Я не баюся такіх абвінавачванняў. Калі з Еўропы гучаць галасы ў падтрымку Лукашэнкі, а з Расіі — у падтрымку апазіцыі, да гэтага трэба прыслухоўвацца і вітаць», — сказаў А.Саннікаў.

«Хто нас падтрымлівае, з тым і будзем размаўляць», — падхапіў У.Някляеў.

Было абвешчана, што напярэдадні выбараў будзе ініцыяваная кампанія супраць датэрміновага галасавання. «Калі вы хочаце жыць у новай Беларусі, то не галасуйце датэрмінова», — сказаў У.Някляеў.

Канкрэтны план сумесных дзеянняў пакуль не абвяшчаўся. Ніякіх пісьмовых пагадненняў кандыдаты не падпісвалі. «Мы джэнтэльмены», — адказаў на гэта А.Саннікаў.

Зміцер Панкавец

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ