На вуліцах сталіцы пакуль вобмаль агітацыйных улётак. Каляровыя толькі ў Раманчука.
На агітацыйных cтэндах пакуль пуставата.
Улётка Рымашэўскага была прымеркаваная да выступу, агітка Саннікава выглядае слабавата.
Міхалевіч не ўпэўнены, што гэта плён працы яго штаба.
Штаб Лукашэнкі не разменьваецца на драбязу (плакат на заднім плане).
З моманту дазволу на агітацыю за кандыдатаў у прэзідэнты мінуў тыдзень. Але на агітацыйных cтэндах, размешчаных на вуліцах сталіцы, пакуль пуставата. У цэнтры горада можна пабачыць агітацыйныя матэрыялы толькі чатырох кандыдатаў: Алеся Міхалевіча, Яраслава Раманчука, Віталя Рымашэўскага і Андрэя Саннікава.
Вонкава найбольш прывабнымі выглядае улётка Раманчука: яна адзіная пакуль каляровая, імя і прозвішча кандыдата, а таксама ягоны перадвыбарчы лозунг бачныя здаля, тэкст улёткі лаканічны і чытэльны.
Улётка Рымашэўскага на сёння ўжо састарэла, бо заклікае да прагляду ягонага выступлення на тэлебачанні 22 лістапада. Тым не менш, прозвішча кандыдата добра бачнае, а подпіс «Ён скажа тое, пра што ўсе маўчаць» інтрыгуе.
Улётка Саннікава выглядае слабавата. Дзве трэція плошчы займае тэкст, набраны дробным шрыфтам. Рэшта — фота кандыдата. Яно не партрэтнае, чорна-белае і цьмянае.
Акрамя таго, на агітацыйных стэндах з’явіліся і ўлёткі без фотаздымка, з лаканічным зместам. На іх напісана «Михалевич или Лукашенко» (у канцы сказа няма пытальніка), літара «м» у прозвішчы Міхалевіча вылучаная чырвоным колерам. Як апынулася, кандыдат у прэзідэнты пра існаванне такой улёткі ўпершыню даведаўся ад «НН». Ён не ўпэўнены, што гэта плён працы яго штаба.
Выглядае, што іншыя кандыдаты ў прэзідэнты пакуль не зацікавіліся магчымасцю дадатковай агітацыі. У тым ліку і каманда Аляксандра Лукашэнкі, якая на дробязі не разменьваецца, пра што ўскосна сведчыць з’яўленне прапагандысцкіх плакатаў у сталіцы на мінулым тыдні.
