Кандыдат у прэзідэнты Мікалай Статкевіч рыхтуе відэазварот да супрацоўнікаў міліцыі з нагоды падзей у дзень выбараў.

«Я сам афіцэр і звярнуся да афіцэраў. На наступным тыдні будзе мой відэазварот да іх», — паведаміў кандыдат падчас сустрэчы з выбаршчыкамі ў Віцебску вечарам 11 снежня.

Статкевіч заклікаў грамадзян да кансалідацыі 19 снежня. «Я асабіста збіраюся прыйсці на Кастрычніцкую плошчу горада Мінска ў 20 гадзін і заклікаю тых, хто не баіцца, прыйсці туды», — сказаў ён.

На пытанні пра магчымы сілавы сцэнарый падзей на плошчы палітык адказаў:

«Супакойцеся, крыві ніякай, я думаю, не будзе.

А вось палохаць будуць, і будуць істэрыкі, будуць падаць на калені і крычаць: не ідзіце, не вядзіце вашых дзяцей!»

«Але вашы дзеці — гэта людзі, — падкрэсліў Статкевіч. — 

Яны прымаюць рашэнне, яны маюць годнасць, іх яшчэ не зламалі. Дык дайце ім магчымасць годна забяспечыць сваю будучыню».

Кандыдат падкрэсліў, што гатовы стаць у першыя шэрагі дэманстрантаў: «Я сябе неяк пазначу і буду наперадзе. Калі здарыцца нейкая небяспека, я буду паміж людзьмі, паміж вамі, вашымі дзецьмі і гэтай небяспекай. Вось гэта я магу вам абяцаць. На жаль, нічога іншага абяцаць не магу».

На пытанне, ці верыць ён, што 20 снежня Лукашэнка можа ўжо не быць прэзідэнтам, Статкевіч заявіў:

«Верыць можна ў Бога, сяброў, блізкіх, у сябе. За ўсё астатняе трэба змагацца».

Сустрэча з выбаршчыкамі праходзіла ў актавай зале інтэрната Віцебскага ліцэя прыборабудавання. Акрамя Статкевіча на ёй прысутнічаў кандыдат у прэзідэнты Дзмітрый Ус. Нягледзячы на тое што інтэрнат знаходзіцца далёка ад цэнтра горада, актавая зала, разлічаная прыкладна на 150 чалавек, была поўнай.

Кандыдат Ус расказаў выбаршчыкам пра сваё асабістае жыццё і дэпутацкую працу, пра тое, што пайшоў у палітыку пасля раптоўнай хваробы і смерці сваёй жонкі, а таксама пра стан прыватнага бізнесу ў Беларусі і адарванасці ўлады ад рэальных праблем людзей.

«Мая асноўная мэта — не агітаваць вас за сябе ці яшчэ за кагосьці, а раскрыць вам вочы на тое, што адбываецца ў нашай краіне. У нас цяпер час раскідваць камяні, а потым будзем збіраць іх», — сказаў ён. Паводле слоў Уса, «другога тура на выбарах не будзе: ужо ўсё вырашана, участковым камісіям ужо пастаўлены задачы».

Раней з выбаршчыкамі Віцебска сустракаліся кандыдаты ў прэзідэнты Андрэй Саннікаў, Віталь Рымашэўскі, Яраслаў Раманчук, а таксама давераныя асобы Уладзіміра Някляева.

Хочаш падзяліцца важнай інфармацыяй ананімна і канфідэнцыйна?