У Мінску пачынае працаваць спецыялізаваны тэлеканал «Жэст» для людзей з парушэннямі слыху. Канал заснаваны Беларускім таварыствам глухіх.
Як паведаміў намеснік старшыні цэнтральнага праўлення таварыства Анатоль Нікіцін, зараз канал праходзіць фінальную стадыю тэставання. Плануецца, што вяшчанне ў поўным аб’ёме пачнецца 9–10 студзеня.
Паводле яго слоў, сетка вяшчання тэлеканала «Жэст» уключае інфармацыйныя, культурна-асветніцкія, адукацыйныя і забаўляльныя праграмы, якія транслююцца з субтытрамі. Фінансаванне канала ажыццяўляецца за кошт сродкаў арганізацыі, а таксама ахвяраванняў добраахвотнікаў.
Як паведаміў Нікіцін, у Беларусі прыкладна 15 тыс. інвалідаў з парушэннямі слыху. Разам з тым, людзей, якія пакутуюць на розныя парушэнні слыху, паводле ацэнкі медыкаў, налічваецца каля 370 тыс. У планах арганізацыі — пашырыць вяшчанне тэлеканала на іншыя гарады і выйсці за межы Беларусі.
Як паведаміла БелаПАН прэс-сакратар ААТ «Мінскія тэлевізійныя сеткі» Наталля Яфімкіна, летась прадпрыемства праводзіла тэставую трансляцыю канала «Жэст» — праграмы выходзілі невялікімі блокамі. Паводле яе слоў, тэставанне паказала, што канал запатрабаваны гледачамі. Транслююцца праграмы на частаце 615, 25 МГц на 39-м канале. Час вяшчання — з 8.00 да 0.00. Канал даступны ў пашыраным пакеце тэлепраграм ААТ «МТІС» без павелічэння абаненцкай платы.
БелаПАН
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
