07.01.2011 / 14:07

Хрыстос нарадзіўся! 11

Праваслаўныя хрысціяне святкуюць Раство Хрыстова. Няхай для Вас і для кожнага іншага чалавека прагучаць гэтыя словы надзеі: «Хрыстос нарадзіўся!»

Рэдакцыя «Нашай Нівы» віншуе ўсіх сваіх чытачоў, якія святкуюць Раство Хрыстова 7 студзеня, з радасным святам. Няхай для Вас і для кожнага іншага чалавека прагучаць словы надзеі: «Хрыстос нарадзіўся!»

Фота intex-press.by.

Мінулай ноччу ва ўсіх храмах пачаліся святочныя набажэнствы.

Мітрапаліт Філарэт узяў удзел ва ўсяночным няспанні, што пачалося ў мінскім Свята-Духавым кафедральным саборы 6 студзеня ў 18.00.

7 студзеня кіраўнік Беларускай праваслаўнай царквы будзе ўдзельнічаць у Божай літургіі, якая пачнецца ў галоўным праваслаўным храме краіны ў 10.00, і ў каляднай вялікай вячэрні (у 16.00).

Плануецца, што сабор наведае Аляксандр Лукашэнка.

У Беларусі дзейнічаюць 1.509 праваслаўных прыходаў, 1.315 храмаў і 31 манастыр; 152 царквы будуюцца. У Беларускім экзархаце Рускай праваслаўнай царквы служаць 1.564 святары.

Традыцыйныя беларускія калядкі. Спявайце самі і з дзецьмі

УЧОРА З ВЯЧОРА

Учора з вячора*
Засвяціла зора.
Зора засвяціла,
Свет узвесяліла.
Свет узвесяліўся:
Хрыстос нарадзіўся.
Хрыстова раджэнне
Людзям на збаўленне.
Людзі, выбягайце,
Хрыста прывітайце.
Хрыста прывітайце,
Нам каляду дайце.

* Кожны радок спяваецца двойчы.

НОВА РАДАСЦЬ СТАЛА

Нова радасць стала,
Яка не бывала.
Над Бетлемам звезда ясна,
Светла засіяла.
Там Хрыстос радзіўся,
З Дзевы ваплаціўся,
На нябесі і на землі
Нам благаславіўся.
Ангелы спяваюць,
Ісуса вітаюць,
На нябесі і на землі
Мір правазглашаюць!

НЕБА I ЗЕМЛЯ

Неба i земля,
Неба i земля,
Радасна спяваюць.
Анёлы свету,
Анёлы свету
Дзiва абвяшчаюць.

Прыпеў:

Хрыстос нарадзiўся,
Бог аб’явiўся,
Анёлы спяваюць,
Пастушкi iграюць,
Дзiва-дзiва абвяшчаюць.

У Бэтлееме,
У Бэтлееме
Вясёла навiна
Чыстая Дзева,
Чыстая Дзева
Нарадзiла Сына.

Прыпеў. А мы Дзiцятку,
А мы Дзiцятку
Богу паклон дайма.
Славу на вышынях,
Славу на вышынях

Яму заспявайма.

Прыпеў.

ЦІХАЯ НОЧ

Ціхая ноч, святая ноч!
Усё спіць, сніць даўно.
Толькі Маці Святая усцяж
Ціха ў яслях люляе Дзіця —
Спі, Сыночак малы,
Люлі-люлі, спі!
А угары усё гарыць
Серабром зорных крыг,
Хор анёлаў пяе пастухом
Аб Дзіцяці, што будзе Хрыстом,
Светлай песняй хвалы
Славяць Збаўцу зямлі.
Ціхая ноч, святая ноч,
Ў родны край завітай,
Людзям сум і тугу разгані,
Хай жа цешацца ў гэтыя дні,
Ў ціхую, святую ноч,
Ў ціхую, святую ноч!

ДОБРЫ ВЕЧАР ТОМУ

Добры вечар тому*,
Хто ў гэтаму дому!
Мы самi з сабою,
З дзецьмi i жаною,
Сталы засцiлаем,
Каляды спраўляем.
А па гэтай мове
Будзьма ўсе здаровы,
А па гэтай казцы
Жывiце ў ласцы.

* Кожны радок спяваецца двойчы.

ЗОРА ЗАСВЯЦІЛА

Учора звячора зора засвяцiла,
Новы год, новы, зора засвяцiла.
А Божая Мацi Сына нарадзiла,
Новы год, новы, Сына нарадзiла.
Сына нарадзiла, у пялёны спавiла,
Новы год, новы, у пялёны спавiла.
У пялёны спавiла, анёлам сказала,
Новы год, новы, анёлам сказала:
Анёлы святыя, калышыце Сына,
Новы год, новы, калышыце Сына.
Калышыце Сына, пойце Яму песнi,
Новы год, новы, пойце Яму песнi.
Пойце Яму песнi, да ўсё i святыя,
Новы год, новы, да ўсё i святыя.
Усе людзi рады, усе весяляцца,
Новы год, новы, усе весяляцца.
На Божага Сына ўсё не наглядзяцца,
Новы год, новы, ўсё не наглядзяцца.

НА НОВА ЛЕТА РАДЗI, БОЖА, ЖЫТА

На нова лета радзi, Божа, жыта,
Шчодры вячор, багаты вячор*,
Жыта пшанiца, усякая пашнiца, Дай табе Божа, пане-гаспадару,
Пiва варыці, сынкоў жанiці,
Гарэлiцу гнацi, дачок выдавацi,
Залезь на баляску i дастань каўбаску!
Стань на драбiнку i дастань саланiнку!
Кошычак маку да таго прысмаку.
Збаночак мёду нам на асалоду.
*Паўтараецца пасля кожнага радка.

Рэд.

0
Dzianis / Адказаць
07.01.2011 / 14:09
Славім яго!
0
Аляксандр / Адказаць
07.01.2011 / 14:12
Са Святам Усіх!!!
0
мінак / Адказаць
07.01.2011 / 14:27
Як заўсёды НН спазьнілася - навіне ўжо 2 тыдні. (Яшчэ раз заклікаю рэдакцыю да рэлігійнай карэктнасьці! Ці ў вас там усе ваяўнічыя праваслаўныя?)
Паказаць усе каментары/ 11 /
Каб пакінуць каментар, калі ласка, актывуйце JavaScript у наладах свайго браўзеру