Башкірскія мытнікі арыштавалі партыю лялек, якія спяваюць крадзеную песню

Выкананне лялькамі знакамітай песні «Расскажи, Снегурочка, где была» праваахоўнікі палічылі парушэннем аўтарскіх правоў.

Як паведамілі ў прэс-службе Башкартастанскай мытні, у Стэрлітамакскі мытны пост адным з мясцовых прыватных прадпрыемстваў была пададзеная мытная дэкларацыя на афармленне 2812 пластмасавых лялек. «Паненкі» кітайскай вытворчасці на агульную суму больш за 11 300 даляраў да таго ж умелі спяваць.

— Падчас праверкі дэкларацыі была прызначаная экспертыза, у выніку якой спецыялісты вынеслі вердыкт аб тым, што «Песня Зайца і Ваўка», выкананая часткай цацак, — гэта аб’ект інтэлектуальнай уласнасці і ахоўваецца аўтарскім правам РФ. Песенька мае сваіх праваўладальнікаў — кампазітара Генадзя Гладкова і паэта Юрыя Энціна, — заявіў прэс-сакратар Башкартастанскай мытні Ігар Мяшкоў.

Каб спыніць парушэнне закона, мытнікам давялося праслухаць усіх лялек. У выніку высветлілася, што «крымінальную» песню з мультфільма спяваюць 435 лялек. Гэтую партыю давялося ў камерсантаў канфіскаваць. Астатнія цацкі, што выдаюць гукі, аўтарскія правы на якія ні за кім не замацаваныя, дапушчаныя да рэалізацыі і неўзабаве змогуць парадаваць амаль дзве з паловай тысячы дзяўчынак Башкірыі.

rg.ru

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ