27.01.2011 / 17:56

На сесіі ПАРЕ ў Страсбургу пачаліся дэбаты па Беларусі 5

На сесіі Парламенцкай асамблеі Савета Еўропы (ПАСЕ), якая праходзіць 27 студзеня ў Страсбургу, пачаліся дэбаты па праекце рэзалюцыі аб сітуацыі ў Беларусі.

Як раней паведамлялася, асноўнае патрабаванне, якое змяшчаецца ў праекце рэзалюцыі, — неадкладнае вызваленне ўсіх затрыманых за ўдзел у дэманстрацыі ў Мінску 19 снежня.

У прыватнасці, у праекце дакумента ПАСЕ ўтрымліваюцца наступныя заклікі да беларускіх улад:

— неадкладна вызваліць усіх апазіцыйных кандыдатаў і іх прыхільнікаў, журналістаў і праваабаронцаў, затрыманых па палітычных матывах;

— спыніць праследаванне і пагрозы апазіцыйных палітыкаў, мас-медыя і прадстаўнікоў грамадзянскай супольнасці;

— правесці празрыстае расследаванне абразлівых і непрапарцыянальных дзеянняў сіл аховы правапарадку супраць дэманстрантаў 19 снежня;

— спыніць выключэнне студэнтаў з універсітэтаў і звальненне людзей з іх працоўных месцаў з-за ўдзелу ў пратэстах;

— перагледзець рашэнне аб закрыцці офіса АБСЕ ў Мінску і прадоўжыць яго мандат да 2011 года і далей;

— завяршыць працэс рэформы выбарчага заканадаўства і яго практычнага прымянення, узяўшы да ўвагі ўсе рэкамендацыі АБСE/БДІПЧ і Еўрапейскай камісіі за дэмакратыю праз права (Венецыянская камісія).

У праекце рэзалюцыі ПАСЕ ўказана на неабходнасць умацоўваць дыялог з беларускімі дэмакратычнымі сіламі, свабоднымі СМІ і праваабаронцамі.

ПАСЕ пацвярджае сваё рашэнне спыніць кантакты з уладамі Беларусі на высокім узроўні.

ПАСЕ таксама заклікае сваё кіраўніцтва не адмяняць рашэнні аб спыненні статусу спецыяльнага запрошанага для парламента Беларусі да той пары, пакуль яе ўладамі не будзе ўведзены мараторый на смяротную кару і пакуль не адбудзецца адчувальнага прагрэсу ў плане дэмакратычных каштоўнасцяў і прынцыпаў, якія падтрымліваюцца Саветам Еўропы.

***

Беларускі парламент атрымаў статус спецыяльнага запрошанага ў ПАСЕ ў 1993 годзе, але ў лістападзе 1996-га пазбавіўся яго пасля канстытуцыйнага рэферэндуму, які значна пашырыў паўнамоцтвы прэзідэнта. У чэрвені 2009 года было прынята рашэнне вярнуць беларускаму парламенту статус спецыяльнага запрошанага ў выпадку, калі Беларусь увядзе мараторый на смяротную кару. Аднак у красавіку 2010 года ПАСЕ прыпыніла кантакты з Беларуссю на высокім узроўні ў сувязі з недастатковым прагрэсам краіны ў галіне адпаведнасці стандартам Савета Еўропы. Нагодай для такога рашэння стала тайнае прывядзенне ў выкананне ў Беларусі двух смяротных прыгавораў.

0
k30-01 / Адказаць
27.01.2011 / 18:10
А хто наступны будзе абмяркоўваць, дэбатаваць?))) Колькі ў іх тамака інстытуцыяў?) карацей, усё зразумела... ніякіх рэальных санкцыяў ня будзе.. йзноў ногі аб ЕЗ вытруць, рэйтынг структуры гэтае яшчэ ніжэй апусьцяць, а Беларусь прададуць Расеі... час ідзе... ня трэба нас шкадаваць, бо большасьць нашых жыхароў падтрымлівае realpolitik.. у сэнсе, пакуль страўнік ёсьць чым набіць дык я свае перакананьні пакіну з сабою.. не выраслі з хлопаў жыхары... Беларусь - Эўропа? хутчэй нагадвае Афрыку.. тамака толькі розьніца ў тым, што за 30$ можна вольна набыць АК-47... але тое самае: абы толкьі не голад, тамака турмы, катаваньні, экалагічныя катастрофы й г.д., гэта ўсё брудная палітыка, а мы ня ўдзельнічаем у гэтым.. але праблема палітыкі ў тым, што любы грамадзянін, нават жыхар памыйні - гэта ўжо частка палітыкі... а наш народ тое не разумее... А тое, што тутака нейкія вельмі здольныя абарыгены жывуць, тое ЭЗ няўцяміць аніяк.. нават хутчэй паверыць, што мы правінцыя РФ.. на некаторых мапах бачым і такія недарэчнасьці дагэтуль))
0
Канстанцiн / Адказаць
27.01.2011 / 18:28
Трансляцыя http://webtv.coe.int/index.php?EventID=12&language=__
0
dansker / Адказаць
27.01.2011 / 18:42
2k30-01 Аяяй, у эўрапейцаў зашмат інстытуцыяў, абмеркаваньні там нейкія... Не, каб адразу дэкрэт "празядзета" й ніякіх табе абмеркаваньняў, праўда? Беларусікі такія беларусікі. Зараз будуць разумнікі мясцовыя яшчэ дурных эўрапейцаў вучыць, як тыя павінны (каму?) скідаць беларускага дыктатара... Беларускі маразм дасягае свайго піку.
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру