02.02.2011 / 10:58

«Ляпіс Трубяцкой»: новая песня і суперконкурс

Гурт «Ляпіс Трубяцкой» прэзентаваў песню «Я веру».

Гурт «Ляпіс Трубяцкой» прэзентаваў песню «Я веру». Яна ўвойдзе ў новы альбом «Весёлые картінкі», рэліз якога запланаваны на 11 сакавіка.

«Я веру ў Ісуса Хрыста, я веру ў Гаўтаму Буду, я веру ў прарока Мухамада...»,

спявае Сяргей Міхалок. Акрамя таго ў новай песні згадваюцца Крышна, Тор, Джа і яшчэ цэлы шэраг багоў розных эпох і кантынентаў.

«Мультыканфесійнасць» новага трэку пракаментаваў лідар «Ляпісаў» Сяргей Міхалок:

— Усё, што датычыць рэлігіі, веры, у нас альбо абрастае патрыярхальным пафасам, альбо людзі пра гэта ўвогуле імкнуцца не гаварыць: аднекваюцца, аджартоўваюцца, хіхікаюць... Таму мне і захацелася зрабіць песню, прысвечаную гэтай складанай і нават, я б сказаў, далікатнай тэме. Прычым такую поп-песеньку, у зразумелым і даступным для ўсіх троххвілінным фармаце.

Магчыма, людзям, якія сур'ёзна цікавяцца філасофіяй, эзатэрыкай, містыкай, яна падасца прымітыўнай, але ў мяне не было жадання занурацца ў тэалагічныя нюансы.

Я проста хацеў зрабіць песню, у якой бы даступна і ясна, ледзь не ў духу дзіцячых лічылак, гаварылася пра тое, як я ўяўляю сабе ўладкаванне Сусвету.

Я ўпэўнены, што кожны народ і кожны чалавек нясе ў сабе часцінку нейкай сакральнай ісціны, усё роўна, адукаваны гэта чалавек ці непісьменны, злы ці добры, прэзідэнт або шахцёр, рэлігійны дзеяч або атэіст. І толькі прыслухоўваючыся адно да аднаго, толькі разам, у салідарнасці, сяброўстве і ўзаемнай павазе мы можам паспрабаваць хаця б на крок наблізіцца да боскай задумы. Гэта вельмі сур'ёзная рэч, і я ў гэта веру.

А калі мы будзем па-ранейшаму знаходзіць заганы ў веры іншых людзей, у іх маральна-этычных прынцыпах, у колеры скуры, у разрэзе вачэй, калі мы будзем будаваць узаемаадносіны на аснове гвалту, то працягнем аддаляцца ад ідэалаў, у тым ліку і рэлігійных, якім на словах служым.

Пры гэтым Міхалок не хоча, каб яго ўспрымалі як наваяўленага прапаведніка, «рок-зорку ў сутане».

— Я — вакаліст гурту «Ляпіс Трубяцкой», а ў любым нашым творы ёсць доля іроніі. Я нават са сваіх уласных перакананняў заўсёды гатовы пасмяяцца, бо чалавечыя погляды — гэта струмень, рака.

Яны зменлівыя, таму што эвалюцыя чалавека, які мысліць, грунтуецца на сумневах, а не на перакананнях. А людзі з цвёрдымі, выразнымі, раз і назаўсёды сфармаванымі перакананнямі — палітычнымі, рэлігійнымі — якраз яны і выбухаюць у аэрапортах.

Конкурс «Будзь свабодным!»

Паслухайце новую песню гурту «Ляпіс Трубяцкой» «Я веру» і стварыце візуальны прадукт па яе матывах (гэта можа быць відэа, фота, анімацыя, графіка, жывапіс, калаж, дэматыватар — усё, што падыходзіць для рэтрансляцыі з манітора ці экрана).

Сябрамі журы, у якое ўвойдуць музыкі «Ляпіса Трубяцкога» і кампаніі «Будзьма разам!», у першую чаргу будзе ацэньвацца творчая ідэя кожнай працы.

10 фіналістаў конкурсу атрымаюць падарункі з аўтографамі ад гурту, а таксама па два квіткі на любы з канцэртаў туру «Весёлые картінкі».

Найлепшыя працы або іх фрагменты будуць выкарыстаныя ў відэаінсталяцыі падчас туру.

А галоўным прызам конкурсу будзе паездка на прэзентацыю альбома «Веселые картінкі» ў Маскву, Санкт-Пецярбург ці Мінск.

Пераможцу будзе аплочана дарога туды і назад з любога пункта СНД, пражыванне ў Маскве, Піцеры ці Мінску, а таксама ўручаны VIP-квіток на канцэрт «Ляпісаў».

Працы прымаюцца да 25 лютага па адрасе: lyapis@budzma.org з пазнакайй «Будзь свабодным!». (Просьба ўказваць сваё імя або псеўданім, узрост, паштовы адрас і нумар мабільнага тэлефона).

Аб'ём дасланага файла не павінен перавышаць 25 Мб.

Тур «Весёлые картінкі»

10 лютага – Ліда, Беларусь. «РДК»

11 лютага – Гродна, Беларусь. «Парламент»

12 лютага – Брэст, Беларусь. «ДК прафсаюзаў»

13 лютага – Віцебск, Беларусь. «Энергія»

16 лютага – Баранавічы, Беларусь. «ГДК»

18 лютага – Кіеў, Украіна. «Бинго»

19 лютага – Сімферопаль, Украіна. «Витамин»

20 лютага – Адэса, Украіна. «Сады победы»

22 лютага – Днепрапятроўск, Украіна. «Тайм-аут»

23 лютага – Луганск, Украіна. «Colosseum»

25 лютага — Запарожжа, Украіна. «ZimaProject»

26 лютага — Данецк, Украіна. «Liverpool»

27 лютага — Харкаў, Украіна. «Жара»

28 лютага — Нікалаеў, Украіна. «Иллюзионъ»

4 сакавіка — Магілёў, Беларусь. «Ліга»

5 сакавіка — Масква, Расія. «Олимпийский». Фестываль «Чартова Дюжина»

6 сакавіка — Санкт-Пецярбург, Расія. «Юбилейный». Фестываль «Чартова Дюжина»

7 сакавіка — Яраслаўль, Расія. «Авангард»

8 сакавіка — Цвер, Расія. «От заката до рассвета»

11 сакавіка — Масква, Расія. «A2»

13 сакавіка — Гомель, Беларусь. Лёгкаатлетычны манеж «Дынама»

18 сакавіка — Санкт-Пецярбург, Расія. «ГлавCLUB»

30 сакавіка — Варшава, Польшча. «Stodola»

1 красавіка — Мінск, Беларусь. «Рэактар»

2 красавіка — Мінск, Беларусь. «Рэактар»

Квіткі на канцэрты ў Мінску: 55 тыс. (толькі танцпляцоўка). У продажы з 15 лютага. Даведка: (017) 288 61 60.

nn.by

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру