Беларусь — Казахстан — 1:1 2

Першую гульню ў новым годзе правяла нацыянальная зборная па футболе. У турэцкай Антальі нашым супрацьстаялі казахі.

Два гады назад каманды супернічалі адна з адной у адборачным турніры да чэмпіянату свету. Тады беларусы двойчы безапеляцыйна аказаліся мацней — 5:1, 4:0.

Цяпер у казахаў змяніўся трэнер. Замест немца Бернда Шторка іх узначаліў чэх Міраслаў Беранек. І з новым настаўнікам каманды з Сярэдняй Азіі не зганьбіліся.

Што датычыць нашых, то гульню па прычыне траўмы прапускаў Антон Пуціла. А новага форварда «Блэкпула» Сяргея Карніленку Штанге ўвогуле не выклікаў.

Загадкай таксама было, ці згуляе Аляксандр Глеб. Згуляў. Прычым, быў адным з самых актыўных на полі.

Увогуле ж у гульні не было шмат вострых момантаў. Асноўныя падзеі матча развіваліся ў цэнтры поля.

Нашы адкрылі лік з пенальці. Адзначыўся Глеб-малодшы.

Доўгі час беларусы ўтрымлівалі гэтую перавагу. Аднак літаральна за пару хвілін да фінальнага свістка форвард талды-курганскага «Жэтысу» Сяргей Астапенка лік зраўняў.

Цікава, што зборная Беларусі не змагла падоўжыць да сямі матчаў рэкордную серыю без прапушчаных галоў.

Наступную сустрэчу нашы правядуць 26 сакавіка з албанцамі ў Тыране. Гэта ўжо будзе адбор да чэмпіянату Еўропы-2012.

Зміцер Панкавец

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ