Меркаванай прычынай надзвычайнага здарэння на прадпрыемстве «Выдатная якасць» у вёсцы Буякі Брэсцкага раёна стаў выбух прапану.
Як паведамлялася, выбух у двухпавярховым цагляным будынку з мансардай з наступным узгараннем адбыўся вечарам 21 лютага. Пад абваленымі канструкцыямі ў памяшканні гаража, размешчанага на цокальным паверсе, апынуліся два чалавекі.
Для разборкі завалаў прыцягваліся больш чым 30 адзінак тэхнікі, а таксама 91 супрацоўнік МНС і 27 работнікаў іншых арганізацый. Работы па пошуку людзей вяліся адначасова з тушэннем пажару, які быў ліквідаваны ў 20.00.
Будынак, дзе адбыўся выбух, належыць прыватнаму гандлёваму ўнітарнаму прадпрыемству «Выдатная якасць». Ён быў пабудаваны ў 2005 годзе.
«Мы схіляемся да версіі, што адбылася ўцечка прапану з балона, які знаходзіўся на цокальным паверсе будынка, —паведаміў следчы следчага аддзела пракуратуры Брэсцкай вобласці Андрэй Ходар. — У выніку газ запоўніў памяшканні гэтага паверху, а менавіта гаража і размешчанага побач з ім склада. Затым адбыўся выбух прапану».
Паводле наяўных звестак, выбух не суправаджаўся гарэннем. «Па ўсёй бачнасці, выбухам раскідала гаручыя матэрыялы, якія захоўваліся ў памяшканні склада і гаража, а таксама адбылося замыканне электраправодкі, таму ўзнік пажар. Не выключана, што быў другі выбух газу, які яшчэ заставаўся ў балоне», — сказаў следчы.
У выніку выбуху былі разбураны апорныя канструкцыі сцен цокальнага і першага паверхаў будынка, што пацягнула за сабой абрушэнне жалезабетонных пліт перакрыцця.
Паводле слоў Ходара, устаноўлена, што прапан выкарыстоўваўся на прадпрыемстве для працы на газазварачным абсталяванні, фрагменты якога былі знойдзены ў гаражы. Гэты ж газ выкарыстоўваўся для працы газавай пліты. У гаражы знойдзены пашкоджаны газавы балон.
22 лютага следчы аддзел пракуратуры Брэсцкай вобласці распачаў па факце выбуху справу па ч. 2 арт. 306 Крымінальнага кодэкса (парушэнне правілаў аховы працы).