09.03.2011 / 11:48

У Беларусь прыбываюць першыя назіральнікі АБСЕ за ходам судоў па справе аб масавых беспарадках 5

Першыя чатыры назіральнікі Бюро па дэмакратычных інстытутах і правах чалавека АБСЕ павінны прыбыць у Беларусь 9 сакавіка, каб назіраць за ходам судовых пасяджэнняў па справе аб масавых беспарадках. Пра гэта паведаміў кіраўнік БДІПЧ АБСЕ Янез Лянарчыч.

Назіральнікі змогуць прысутнічаць на працэсах Дзмітрыя Мядзведзя, а таксама расійскіх грамадзян Івана Гапонава і Арцёма Брэуса. Судовы разбор у дачыненні да іх будзе адноўлены 10 сакавіка.

«У якасці дзяржавы — удзельніцы АБСЕ Беларусь узяла на сябе абавязацельства дапускаць міжнародных назіральнікаў на пасяджэнні суда. Назіральнікі ацэняць, наколькі судовыя працэсы адпавядаюць нацыянальнаму заканадаўству і нормам справядлівага судовага разбору, што ўтрымліваюцца ў дакументах АБСЕ і юрыдычна абавязковых міжнародных пагадненнях», — цытуе Янеза Лянарчыча прэс-служба АБСЕ.

Эксперты БДІПЧ будуць назіраць за асноўнымі судовымі разборамі па справе аб масавых беспарадках, па выніках маніторынгу бюро апублікуе справаздачу.

6 сакавіка начальнік упраўлення інфармацыі — прэс-сакратар МЗС Беларусі Андрэй Савіных паведаміў БелаПАН, што краіна запрасіла назіральнікаў АБСЕ для ўдзелу ў судовых працэсах па справе аб падзеях 19 снежня.

«Беларусь дэманструе сваю адкрытасць партнёрам па АБСЕ. Мы хочам, каб удзел знешніх экспертаў пацвердзіў, што ўсе судовыя працэсы праходзяць у поўнай адпаведнасці з нацыянальным заканадаўствам», — сказаў Савіных.

Нагадаем, абвінавачанымі па крымінальнай справе аб масавых беспарадках з’яўляюцца 42 чалавекі. Чацвёра ўжо асуджаны. 17 лютага суд Фрунзенскага раёна Мінска прыгаварыў Васіля Парфянкова да чатырох гадоў пазбаўлення волі ў калоніі строгага рэжыму. 2 сакавіка ў тым жа судзе былі вынесены прыгаворы яшчэ тром абвінавачаным: Аляксандр Малчанаў асуджаны на тры гады пазбаўлення волі, Дзмітрый Новік — на тры з паловай, Аляксандр Атрошчанкаў, прэс-сакратар кандыдата ў прэзідэнты на выбарах-2010 Андрэя Саннікава, — да чатырох гадоў. Яны будуць адбываць пакаранне ў калоніі ўзмоцненага рэжыму.

31 снежня 2010 года Беларусь праінфармавала членаў Пастаяннага савета АБСЕ аб рашэнні не прадаўжаць мандат мінскага офіса арганізацыі ў сувязі з «адсутнасцю аб’ектыўных падстаў для захавання місіі».

На думку палітолагаў, прычынай закрыцця офіса стала негатыўная ацэнка прадстаўнікамі АБСЕ вынікаў прэзідэнцкіх выбараў у Беларусі.

Хочаш падзяліцца важнай інфармацыяй ананімна і канфідэнцыйна?

0
Юрген / Адказаць
09.03.2011 / 12:04
Блін, ну гэтыя западэнцы... Ў йіх офіс нахабна зачынілі, а яны ізноў маюць стасункі з пачварным рэжымам, тым самым зацвержваючы ягоную легітымнасць. А таму гэткага і тэба.
0
Я / Адказаць
09.03.2011 / 12:12
Паседжанні можа і праходзяць у адпаведнасці з нацыянальным заканадаўствам, але прысуды не адпавядаюць доказнай базе пад час гэтых працэсаў. А прысуды АБСЭ ацэньваць ніхто не запрашаў.Таму справаздача будзе на карысць уладыі людзі з маўклівага адабрэння АБСЭ будуць сядзець ад 3 да 15 гадоў за кратамі...
0
Андрусь / Адказаць
09.03.2011 / 12:48
уважаемые комментаторы, иногда полезно включать МОЗГ.. Праваабаронца Алена Танкачова ўпэўненая, што рашэнне беларускага Міністэрства замежных справаў запрасіць на суды над удзельнікамі Плошчы назіральнікаў ад АБСЕ – не сведчанне адкрытасці, а хутчэй вымушаная захада. “Тое, што тут будуць прадстаўнікі офісу АБСЕ – гэта фактычна гарантыя таго, што хоць нейкія незалежныя назіральнікі змогуць назіраць за працэсам ад пачатку да канца”, – кажа Алена Танкачова. http://belsat.eu/be/wiadomosci/a,1849,aliena-tankachova-zaprashennie-absie-nie-aznachaie-shto-vyraki-buduts-miakkiia.html
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру