У касацыйнай калегіі Вышэйшага гаспадарчага суду пачаўся разгляд скаргі Міністэрства інфармацыі да «Аўтарадыё».
Нагадаем, што 9 сакавіка Вышэйшы гаспадарчы суд прызнаў несапраўдным папярэджаньне Мінфінфарму і рашэньне Рэспубліканскай камісіі па тэлебачаньні і радыёвяшчаньні аб забароне наземнага вяшчаньня для «Аўтарадыё».
У складзе калегіі тры судзьдзі. Адзін зь іх пачаў зачытваць скаргу Міністэрства інфармацыі.
«Аўтарадыё» атрымала пісьмовую копію пастановы Вышэйшага гаспадарчага суду пра тое, што папярэджаньне Мінінфарму і адключэньне перадатчыка прызнаныя неадпаведнымі закону. Дакумэнт перададзены ў Міністэрства сувязі і Дзяржаўную інспэкцыю па электрасувязі, але там не сьпяшаюцца яго выконваць і ўключаць перадатчык.
Інспэкцыя чакае разгляду касацыйнай скаргі Міністэрства інфармацыі. Міністэрства палічыла экстрэмісцкім заклікам фразу зь перадвыбарчай праграмы Андрэя Саньнікава — «Лёс краіны вырашаецца не на кухні, а на плошчы». Фраза прагучала ў эфіры «Аўтарадыё» і была растыражавана амаль дзясяткам СМІ.
