Экс-кандыдат у прэзідэнты Аляксей (Алесь) Міхалевіч, які зараз знаходзіцца ў Чэхіі, гатовы даць Генеральнай пракуратуры Беларусі тлумачэнні адносна сваёй заявы пра катаванні ў следчым ізалятары Камітэта дзяржбяспекі.
Пра гэта паведаміла яго жонка.
Паводле слоў Міланы Міхалевіч, яна трэці дзень спрабуе звязацца з супрацоўнікам Генпракуратуры, які падпісваў пазоў яе мужу з выклікам для дачы тлумачэнняў, каб даведацца, як можна арганізаваць гэтую працэдуру. Напрыклад, ці магчыма падаць натарыяльна завераныя паказанні. Аднак ёй увесь час адказваюць, што супрацоўнік знаходзіцца ў СІЗА КДБ.
«Відаць, у Генпракуратуры не асабліва імкнуцца атрымаць тлумачэнні», — мяркуе Мілана Міхалевіч.
Як паведамлялася раней, на падставе заявы палітыка па даручэнні генеральнага пракурора Рыгора Васілевіча ў следчым ізалятары арганізавана пракурорская праверка. І, як паведамілі агенцтву ў Генпракуратуры, яна яшчэ працягваецца.
А. Міхалевіч, які папрасіў палітычнага прытулку ў Чэхіі, зараз знаходзіцца ў каранцінным лагеры ў Брно. Там забаронена карыстацца мабільнымі тэлефонамі, сказала Мілана Міхалевіч, таму з мужам яна не размаўляла. Ён толькі прыслаў электроннае паведамленне, што ў яго ўсё ў парадку.
Нагадаем, ноччу 14 сакавіка ў сваім блогу Аляксей Міхалевіч аб’явіў, што знаходзіцца «не ў зоне дасягальнасці беларускага КДБ».
Рух «За Свабоду» паведаміў, што яму ўдалося ноччу выехаць з краіны, дарога ў «надзейнае месца» заняла суткі. Сям’я засталася ў Мінску. «Для мяне існуе адзіная прычына, якая апраўдвае такія мае крокі, — гэта рэальная фізічная пагроза, — заявіў
Аляксей Міхалевіч праходзіць абвінавачваным па крымінальнай справе аб масавых беспарадках у Мінску 19 снежня 2010 года (арт. 293 КК). Ён быў затрыманы ў ноч на 20 снежня. 19 лютага яго адпусцілі са следчага ізалятара КДБ пад падпіску аб нявыездзе.