Ці праўда, што самае бруднае ў крамах — гэта каляскі і кошыкі?

Навукоўцы ўніверсітэта Арызоны даследавалі 85 крамных калясак з чатырох штатаў ЗША. Вынікі, атрыманыя падчас вывучэння мазкоў, шакавалі спецыялістаў.

Так, на 72% «паддоследных» былі выяўленыя сляды бактэрый. Адпаведна, наведвальнікі буйных крамаў з вялікім «пасажырапатокам» рызыкуюць атрымаць разам з прадуктамі харчавання кішэчную інфекцыю. Што ўжо казаць пра дзяцей, якіх бацькі часта катаюць па гандлёвых залах у калясках? Зрэшты, гаворка пра Амерыку. «НГ» вырашыла высветліць, ці праходзяць каляскі і кошыкі санітарную апрацоўку ў беларускіх крамах і супермаркетах.

Прадстаўнікі большасці гандлёвых сетак у адказ на пытанне толькі разводзяць рукамі: «Напэўна, іх мусяць мыць».

Праўда, апісаць працэс гэтага самага мыцця маглі далёка не ўсё.

— У нас каляскі і кошыкі ў канцы кожнага працоўнага дня праціраюць і мыюць адмысловым сродкам, — расказалі ў адной з крамаў «Суседзі». — Усе патрабаванні санэпідслужбы мы выконваем.

Праўда, патрабаванні гэтыя даволі абстрактныя.

— У адпаведнасці з санітарнымі правіламі ўсё абсталяванне на прадпрыемствах павінна трымацца ў чысціні, — патлумачыла загадчыца аддзялення гігіены харчавання санітарна-эпідэміялагічнай службы Мінска Марына Байбус. — Тэхналогія апрацоўкі якіх-небудзь прадметаў, у тым ліку калясак і кошыкаў, распрацоўваецца непасрэдна на самім прадпрыемстве. Работнікі крамаў і супермаркетаў могуць карыстацца пры апрацоўцы ўсімі дазволенымі Міністэрствам аховы здароўя сродкамі.

Іншымі словамі, каляску або кошык досыць працерці вільготнай анучай з мылам адзін раз на дзень. Праўда, каб пазбавіцца ад усіх мікробаў, гэтага недастаткова.

Так што заклік мыць рукі, прыйшоўшы дадому, гучыць вельмі нават актуальна.

ng.by

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ