У Мінску затрыманы ўдзельнікі акцыі супраць закрыцця рэспубліканскай бальніцы ДВП МУС 1

Супрацоўнікі праваахоўных органаў 1 красавіка спынілі спробы актывістаў нацыянал-бальшавіцкага руху правесці ў Мінску флешмоб супраць закрыцця Рэспубліканскай агульнасаматычнай бальніцы дэпартамента выканання пакаранняў (ДВП) МУС.

Затрымана прыблізна дзесяць чалавек.

Удзельнікі флешмоба збіраліся перадаць у ДВП адпаведны зварот. Пры гэтым яны неслі з сабой маленькую кардонную труну — яна заклікана была сімвалізаваць, што можа здарыцца са зняволенымі, пазбаўленымі медыцынскай дапамогі. На падыходзе да будынка ДВП удзельнікаў акцыі затрымалі супрацоўнікі праваахоўных органаў у цывільным, якія не назвалі сябе. Яны таксама спрабавалі перашкодзіць працы фотакарэспандэнта БелаПАН Вольгі Кляшчук, матывуючы гэта тым, што будынак ДВП з’яўляецца рэжымным аб’ектам.

У выніку затрымана прыблізна дзесяць чалавек — іх пасадзілі ў аўтобус і павезлі ў невядомым напрамку.

Як паведаміў БелаПАН напярэдадні акцыі адзін з яе арганізатараў Дзмітрый Сіняк, 1 красавіка 2011 года спыняе дзейнасць Рэспубліканская агульнасаматычная бальніца ДВП. «Новая бальніца, якую паводле ўказа кіраўніка дзяржавы планавалі пабудаваць да закрыцця старой, дагэтуль не пабудавана і, мяркуючы па тэмпах будаўнічых работ, наўрад ці зможа прыняць сёлета першых пацыентаў», — сказаў ён.

Паводле слоў Сіняка, прынятыя меры па скарачэнні колькасці асоб, якія паступаюць на лячэнне ў бальніцу, разам з мерамі па скарачэнні шэрагу аддзяленняў і медыцынскага персаналу ўжо прывялі да павелічэння смяротнасці ў шэрагу ўстаноў папраўчай сістэмы.

«Пры поўным закрыцці бальніцы спецыялісты прагназуюць павелічэнне смяротнасці па ўсёй крымінальна-выканаўчай сістэме як мінімум на 30%. Усе іншыя меры, прапанаваныя чыноўнікамі, напрыклад варыянт разгортвання на базе СІЗА № 1 бальніцы на 60 ложкаў супраць 300 у старой, выглядаюць толькі нікчэмнымі спробамі нядбайных „слуг народа“ адхрысціцца ад праблемы», — заявіў арганізатар акцыі.

«Сітуацыя, звязаная са спыненнем дзейнасці агульнасаматычнай бальніцы, закранае інтарэсы сотняў тысяч грамадзян нашай краіны. Топчуцца правы і свабоды асоб, якія зняволены або знаходзяцца пад следствам, у прыватнасці — гарантаванае Канстытуцыяй права на ахову здароўя, уключаючы бясплатнае лячэнне ў дзяржаўных установах аховы здароўя», — падкрэсліў Сіняк.

У звароце, які нацыянал-бальшавікі планавалі перадаць у ДВП, утрымліваецца заклік да ўрада Беларусі «ўсімі магчымымі спосабамі і ў кароткі тэрмін вырашыць праблему аказання неабходнай медыцынскай дапамогі асобам, што знаходзяцца ў папраўчых установах і СІЗА; правесці расследаванне і пакараць вінаватых асоб, адказных за невыкананне планавых работ па ўзвядзенні Рэспубліканскай агульнасаматычнай бальніцы; у перспектыве разгледзець пытанне аб шырокамаштабнай амністыі і рэфармаванні крымінальнага заканадаўства з мэтай змякчэння пакаранняў па шэрагу артыкулаў і ўвядзення альтэрнатыўных змяшчэнню пад варту мер пакарання».

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ