Намеснік старшыні міжнароднай маладзёжнай арганізацыі «Малады фронт» (Чэхія) Анастасія Палажанка пачынае знаёміцца з матэрыяламі крымінальнай справы без адваката.
Паводле слоў Палажанкі, яна выклікана 1 красавіка ў КДБ на 15 гадзін. «Мне канкрэтна сказалі, што я буду знаёміцца з матэрыяламі справы. Разам з тым я пацвярджаю, што сваю віну я не прызнаю і адмаўляюся ад дачы паказанняў», — сказала Палажанка.
Яна зазначыла, што з матэрыяламі крымінальнай справы будзе знаёміцца без адваката Кацярыны Пятровіч. «Рэч у тым, што тады б я падстройвалася пад графік працы адваката, а ў яе, апрача мяне, вельмі шмат спраў. Таму я прыняла рашэнне знаёміцца са справай без адваката, каб зэканоміць час і яе, і мой», — сказала Палажанка.
Нагадаем, раней Анастасія Палажанка абвінавачвалася на падставе артыкула 293 КК (масавыя беспарадкі), 30 сакавіка ў КДБ ёй паведамілі, што гэтае абвінавачанне знята і прад’яўлена новае — па артыкуле 342 КК (арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх).